தமிழ் பிரபலமாக இருந்த நடிகையை வினய் காதலித்து வருவதாகவும், விரைவில் அவரை திருமணம் செய்யவுள்ளதாகவும் தகவல்கள் வெளியாகியுள்ளன.
மறைந்த ஒளிப்பதிவாளர் ஜீவா இயக்கிய ‘உன்னாலே உன்னாலே’ படம் மூலம் சினிமாவில் அறிமுகமானவர் வினய் ராய். கர்நாடகா மாநிலம் பெங்களூருவைச் சேர்ந்த இவர், தொடர்ந்து பல்வேறு படங்களில் நடித்தார்.
தற்போது வில்லன் நடிகராக களமிறங்கி சிறப்பான நடிப்பை வெளிப்படுத்தி வருகிறார். கடந்த 2017-ம் ஆண்டு விஷால் நடிப்பில் வெளியான ‘துப்பறிவாளன்’ படம் இவருக்கு நல்ல அடையாளத்தை வழங்கியது.
மேலும் சிவகார்த்திகேயன் நடிப்பில் வெளியான டாக்டர், எதற்கும் துணிந்தவன் உள்ளிட்ட படங்களில் நடித்து தொடர்ந்து கவனமீர்த்து வருகிறார். இவரும் பிரபல நடிகை விமலா ராமனும் காதலித்து வருவதாக செய்திகள் தெரிவிக்கின்றன.
ஆஸ்திரேலியாவைச் சேர்ந்த விமலா ராமன், தமிழ்நாட்டை பூர்வீகமாகக் கொண்டவர். இவர்கள் இருவரும் கடந்த 2011-ம் ஆண்டு வெளியான ‘டாம் 999’ படத்தில் இணைந்து நடித்தனர். அப்போது முதல் காதலித்து வருவதாக தகவல்கள் தெரிவிக்கின்றன.
விரைவில் வினய் மற்றும் விமலா ராமன் திருமண அறிவிப்பை வெளியிடலாம் என கூறப்படுகிறது. இதற்கிடையில் இவர்கள் இருவரும் நெருக்கமாக எடுத்துக் கொண்ட புகைப்படங்கள் சமூகவலைதளங்களில் வைரலாகி வருகிறது.