இது 21ம் நூற்றாண்டின் முள்ளும் மலரும்…. 5 மில்லியன் வியூஸ்களை கடந்த ‘அண்ணாத்த’ ட்ரைலர்!!

‘தர்பார்’ திரைப்படத்தின் வெற்றிக்கு பிறகு சூப்பர் ஸ்டார் ரஜினிகாந்த், ’சிறுத்தை’ சிவா இயக்கத்தில் ‘அண்ணாத்த’ படத்தில் நடித்து முடித்துள்ளார்.

லேடி சூப்பர்ஸ்டார் நயன்தாரா, கீர்த்தி சுரேஷ், குஷ்பு, மீனா, பிரகாஷ் ராஜ், சூரி, சதீஷ் என நட்சத்திர பட்டாளமே இத்திரைப்படத்தில் நடித்துள்ளனர்.

இமான் இசையமைத்துள்ளார். தீபாவளியை முன்னிட்டு வரும் நவம்பர் 4-ஆம் தேதி படம் வெளியாகிறது என அதிகாரப்பூர்வமாக அறிவிக்கப்பட்டுள்ளது.

இதுவரை படத்தின் மூன்று பாடல்களும் டீசரும் வெளியாகி வரவேற்பை பெற்று வரும் நிலையில் நேற்று இத்திரைப்படத்தின் ட்ரெய்லர் வெளியாகியுள்ளது. ட்ரெய்லர் மற்றுமொரு ‘முள்ளும் மலரும்’ படம் போல் அண்ணன் – தங்கை பாசக்கதை என்பதை உணர்த்துகிறது. அண்ணனாக ரஜினியும் பாசமே உருவான தங்கையாக கீர்த்தி சுரேஷும் அதகளப்படுத்துகிறார்கள். இதில் நயன்தாராவை விட கீர்த்தி சுரேஷிற்கே அதிகம் முக்கியத்துவம் தரப்பட்டுள்ளதாக தெரிகிறது.

பிரகாஷ் ராஜ், ஜெகபதி பாபு வில்லன்களாக நடிப்பில் மிரட்டுகிறார்கள். ட்ரெய்லர் வெளியான சில நிமிடங்களிலேயே பல லட்சம் பார்வைகளை தாண்டிச் சென்ற நிலையில் இன்று காலை ஒன்பது மணி அளவில் 5 மில்லியன் வியூஸ்களை அண்ணாத்த ட்ரைலர் கடந்துள்ளது.