புதுடெல்லி: வாக்காளர் பட்டியல் சிறப்புத் தீவிரத் திருத்தம் (எஸ்ஐஆர்) மற்றும் தலைமைத் தேர்தல் ஆணையர் ஞானேஷ் குமார் தொடர்பான விவகாரங்கள் குறித்து நேரில் சந்திக்கக் கோரிய காங்கிரஸின் வேண்டுகோளை, உச்ச நீதிமன்றத் தலைமை நீதிபதி சூர்ய காந்த் ஏற்கவில்லை எனச் செய்தி வெளியாகியுள்ளது.
இதே விவகாரங்கள் தொடர்பான வழக்குகள் உச்ச நீதிமன்றத்தில் நிலுவையில் இருப்பதால், கோரிக்கைகளை உரிய மனுவாகத் தாக்கல் செய்து நீதிமன்றத்தை அணுகலாம் என்று அவர் தெரிவித்துள்ளதாக, சட்டச் செய்தித் தளமான LiveLaw-ஐ மேற்கோள்காட்டி Outlook செய்தி வெளியிட்டுள்ளது.
நாளை தொடர்புடைய வழக்குகள் விசாரணை
எஸ்ஐஆர் தொடர்பான வழக்குகள் நாளை (அக்டோபர் 13) விசாரணைக்குப் பட்டியலிடப்பட்டுள்ளதாகவும், புதிய மனு தாக்கல் செய்யப்பட்டால் நிலுவையில் உள்ள வழக்குகளுடன் பரிசீலிக்கப்படலாம் என்றும் அந்தச் செய்தியில் தெரிவிக்கப்பட்டுள்ளது.
தலைமை நீதிபதியை நிர்வாக ரீதியாகச் சந்திப்பதற்குப் பதிலாக, நீதிமன்ற நடைமுறையின் மூலம் கோரிக்கைகளை முன்வைக்கலாம் என்பதே அவரது பதிலின் சாரமாகக் குறிப்பிடப்பட்டுள்ளது.
இன்று எதிர்க்கட்சிகளின் பேரணி
இதற்கிடையே, தேர்தல் நடைமுறைகள் தொடர்பான குற்றச்சாட்டுகளை முன்வைத்து இந்தியா கூட்டணி இன்று டெல்லியில் பேரணி நடத்தத் திட்டமிட்டுள்ளது. எஸ்ஐஆர் நடவடிக்கையை நிறுத்துதல், தலைமைத் தேர்தல் ஆணையரின் பதவி விலகல் உள்ளிட்ட கோரிக்கைகளை வலியுறுத்தி மனு அளிக்க உள்ளதாகக் காங்கிரஸ் தெரிவித்துள்ளது.