மும்பை: இந்தியத் தலைமைத் தேர்தல் ஆணையர் ஞானேஷ் குமார் செப்டம்பர் 26-ஆம் தேதிக்குள் பதவி விலகாவிட்டால், அக்டோபர் 2 முதல் நாடு தழுவிய போராட்டம் நடத்தப்படும் என்று ‘Cockroach Janta Party’ (CJP) அமைப்பு அறிவித்துள்ளது.
மும்பையில் தொடங்கும் போராட்டம்
CJP நிறுவனர் அபிஜீத் டிப்கே வெளியிட்ட அறிவிப்பில், தலைமைத் தேர்தல் ஆணையர் பதவி விலகத் தவறினால் போராட்டம் மும்பையில் தொடங்கி, இந்தியாவின் பல்வேறு நகரங்களுக்கும் விரிவுபடுத்தப்படும் என்று தெரிவித்துள்ளார். முன்னதாக, பதவி விலகுவதற்கு ஞானேஷ் குமாருக்கு அந்த அமைப்பு 48 மணி நேரக் கெடு விதித்திருந்தது.
வாக்காளர் பட்டியல் மாற்றம் தொடர்பான சர்ச்சை
வாக்காளர் பட்டியல்களில் மேற்கொள்ளப்பட்ட மாற்றங்கள் குறித்து ஞானேஷ் குமாரிடம் அவருக்குக் கீழ் பணியாற்றும் அதிகாரிகள் கேள்வி எழுப்பியதாக நாளிதழ் ஒன்றில் செய்தி வெளியானது. அந்த மாற்றங்கள் ஆளும் பாரதிய ஜனதா கட்சிக்குச் சாதகமாக இருப்பதாக எதிர்க்கட்சிகள் குற்றஞ்சாட்டுகின்றன. இந்தப் பின்னணியில், எதிர்க்கட்சிகளும் CJP அமைப்பும் தலைமைத் தேர்தல் ஆணையரின் பதவி விலகலை வலியுறுத்தியுள்ளன.
தேர்தல் ஆணையம் விளக்கம்
எந்தவொரு நிறுவனத்திலும் அதிகாரிகளுக்கு இடையே கருத்து வேறுபாடுகள் ஏற்படுவது இயல்பானது என்று இந்தியத் தேர்தல் ஆணையம் தெரிவித்துள்ளது. மேலும், தேர்தல் ஆணையம் மேற்கொண்ட அனைத்து நடவடிக்கைகளும் சட்டத்துக்கு உட்பட்டவை என்றும் விளக்கம் அளித்துள்ளது.