புதுடெல்லி: மத்திய அரசின் மூத்த ஓய்வூதியதாரர்கள் மற்றும் குடும்ப ஓய்வூதியதாரர்களின் 897 நீண்டகாலக் குறைகளுக்குத் தீர்வுகாணும் 17-வது ‘ஓய்வூதிய அதாலத்’ புதுடெல்லியில் நாளை நடைபெறுகிறது.
மத்திய பணியாளர், பொதுமக்கள் குறைதீர்ப்பு மற்றும் ஓய்வூதியத் துறை இணையமைச்சர் ஜிதேந்திர சிங் தலைமையில், இந்தியப் பொது நிர்வாக நிறுவனத்தின் டி.என்.சதுர்வேதி நினைவு அரங்கில் இந்தச் சிறப்பு முகாம் நடைபெறுகிறது.
24 அமைச்சகங்களின் குறைகள்
மத்திய அரசின் 24 அமைச்சகங்கள் மற்றும் துறைகள் தொடர்பாக CPENGRAMS இணையதளத்தில் ஏற்கெனவே பதிவு செய்யப்பட்ட 897 குறைகள் விசாரணைக்கு எடுத்துக்கொள்ளப்படுகின்றன. மிக மூத்த ஓய்வூதியதாரர்கள் மற்றும் குடும்ப ஓய்வூதியதாரர்களின் நீண்டகாலக் கோரிக்கைகளுக்கு இந்த முறை முன்னுரிமை அளிக்கப்பட்டுள்ளது.
ஓய்வூதியதாரர்கள், குடும்ப ஓய்வூதியதாரர்கள் மற்றும் அவர்களின் உறவினர்கள் நேரடியாகவும் காணொலி வாயிலாகவும் விசாரணையில் பங்கேற்க ஏற்பாடு செய்யப்பட்டுள்ளதாக மத்திய அரசு தெரிவித்துள்ளது.
புதிதாகப் புகார் அளிக்கும் முகாம் அல்ல
நாளைய ஓய்வூதிய அதாலத்தில், CPENGRAMS தளத்தில் ஏற்கெனவே பதிவு செய்யப்பட்டு விசாரணைக்குத் தேர்வு செய்யப்பட்டுள்ள 897 குறைகள்தான் பரிசீலிக்கப்படுகின்றன. பொதுமக்கள் நேரடியாகச் சென்று புதிதாகப் புகார் அளிக்கும் திறந்த முகாமாக இது அறிவிக்கப்படவில்லை.
புதிதாக ஓய்வூதியக் குறை உள்ளவர்கள் CPENGRAMS இணையதளம் வாயிலாகப் புகாரைப் பதிவு செய்து, அதன் நிலையைத் தொடர்ந்து கண்காணிக்கலாம். அளிக்கப்பட்ட தீர்வில் திருப்தி இல்லாவிட்டால் மேல்முறையீடு செய்யும் வசதியும் அந்தத் தளத்தில் உள்ளது.
இதுவரை 20,676 குறைகளுக்குத் தீர்வு
மத்திய ஓய்வூதியம் மற்றும் ஓய்வூதியதாரர்கள் நலத்துறை, 2017ஆம் ஆண்டு ஓய்வூதிய அதாலத் திட்டத்தை அறிமுகப்படுத்தியது. இதுவரை நடைபெற்ற 16 முகாம்களில் எடுத்துக்கொள்ளப்பட்ட 28,797 குறைகளில் 20,676 குறைகளுக்கு அந்தந்த முகாம்களிலேயே தீர்வு காணப்பட்டுள்ளது.
இந்தத் திட்டத்தின் உடனடித் தீர்வு விகிதம் 71.79 சதவீதமாக இருப்பதாக மத்திய அரசு தெரிவித்துள்ளது. தீர்க்கப்படாமல் இருந்த மற்ற குறைகளும் அமைச்சகங்களுக்கு இடையிலான ஆய்வுக் கூட்டங்கள் மூலம் தொடர்ந்து பரிசீலிக்கப்பட்டதாகக் கூறப்பட்டுள்ளது.
நீதிமன்ற வழக்குகளுக்குச் செல்லாமல், சம்பந்தப்பட்ட அனைத்து அரசுத் துறைகளையும் ஒரே மேடைக்குக் கொண்டுவந்து குறைகளுக்குத் தீர்வு காண்பதே ஓய்வூதிய அதாலத்தின் முக்கிய நோக்கமாகும்.
நிகழ்ச்சியின்போது கடந்த மே 13ஆம் தேதி நடைபெற்ற 16-வது ஓய்வூதிய அதாலத்தின் வெற்றிக் கதைகள் அடங்கிய துண்டுப் பிரசுரங்களும், குடும்ப ஓய்வூதியம் தொடர்பான அடிக்கடி கேட்கப்படும் கேள்விகள் அடங்கிய கையேடும் வெளியிடப்பட உள்ளன.