மாணவர்களுக்கு ஆன்லைனில் கேம்பஸ் இன்டர்வியூ தொடங்கியது – அண்ணா பல்கலை., அறிவிப்பு

சென்னையில் அண்ணா பல்கலைக்கழக பொறியியல் மாணவர்களுக்கான கேம்பஸ் இன்டர்வியூ ஆன்லைன் மூலம் தொடங்கியுள்ளது.

அண்ணா பல்கலைக்கழகத்தில் ஆண்டுதோறும் இறுதியாண்டு படிக்கும் மாணவர்களுக்கு, சர்வதேச அளவிலான நிறுவனங்களில் கேம்பஸ் இன்டர்வியூ மூலம் வேலைவாய்ப்புகள் ஏற்படுத்தி தரப்படுவது வழக்கம்.

இந்நிலையில், நடப்பாண்டிற்கான கேம்பஸ் இன்டர்வியூ கொரோனா தொற்று காரணமாக தடைப்பட்ட நிலையில், நேர்காணல் ஆன்லைன் மூலம் தொடங்கியுள்ளது.

அந்த வகையில் சென்னை கிண்டியில் உள்ள அண்ணா பல்கலைக்கழக வளாகத்தில் செயல்பட்டு வரும் கிண்டி பொறியியல் கல்லூரி, அழகப்பா தொழில்நுட்ப கல்வி, குரோம்பேட்டை தொழில்நுட்ப கல்லூரி மற்றும் கட்டடவியல் வடிவமைப்பு கல்வி நிலையம் ஆகியவற்றில் பயிலும் மாணவர்களுக்கான கேம்பஸ் இன்டர்வியூ ஆன்லைன் மூலம் தொடங்கப்பட்டு உள்ளது.

தற்போது நடைபெற்று வரும் இந்த நேர்காணல் செப்டம்பர் 30ம் தேதி வரை நடைபெறும் நிலையில், சுமார் முதற்கட்ட நேர்காணலில் கலந்து கொள்வதற்காக 3,300 மாணவர்கள் பதிவு செய்துள்ளனர். இந்த கேம்பஸ் இன்டர்வியூயில் 25 வெளிநாட்டு நிறுவனங்கள் பங்கேற்கின்றன. அவற்றில் சுமார் 12 லட்சம் முதல் 28 லட்சம் வரை ஆண்டிற்கு ஊதியமாக கிடைக்கும் பணிகளுக்கான வேலைவாய்ப்புகள் வழங்கப்பட உள்ளன.