ஓசூர் அருகே அமைக்கப்பட்டுள்ள ஓலா ஈ- ஸ்கூட்டர் தயாரிக்கும் தொழிற்சாலையில் 10,000 பெண்கள் பணியமர்த்தப்பட உள்ளதாக அதன் சிஇஓ தெரிவித்துள்ளார்.
ஓலா எலெக்ட்ரிக் நிறுவனம் கடந்த மாதம் எஸ் 1 இ- ஸ்கூட்டரை அறிமுகம் செய்தது. இதன் விற்பனை நாளை முதல் துவங்கும் என எதிர்பார்க்கப்படுகிறது. இந்த நிலையில் தற்போது முழுக்க முழுக்க பெண்களே பணியாற்றும் உலகின் மிகப்பெரிய வாகன தயாரிப்பு தொழிற்சாலையாக ஓலா எதிர்கால தொழிற்சாலை அமையும் என்று அதன் சிஇஓ பாவிஷ் அகர்வால் தெரிவித்துள்ளார். தொழிற்சாலையில் பணியாற்ற உள்ள முதல் பெண்கள் குழுவினருக்கு சிறப்பான வரவேற்பு கொடுக்கப்பட்டது.
ஓலா எதிர்கால தொழிற்சாலையில் தயாரிக்கப்படும் ஒவ்வொரு வாகனத்தின் முழு உருவாக்கத்தையும் பெண்களே கவனித்துக் கொள்வார்கள் என்றும் பாவீஷ் அகர்வால் தனது பேச்சில் குறிப்பிட்டுள்ளார். பொருளாதார வாய்ப்புகளை பெண்களுக்கு வழங்குவது அவர்களின் வாழ்க்கை மற்றும் குடும்பத்தை மட்டுமல்ல முழு சமூகத்தையும் மேம்படுத்தும் என்றும் அவர் தெரிவித்தார்.