அம்பேத்கர் இந்த நூற்றாண்டின் புதிய புத்தர் என்று மு.க.ஸ்டாலின் புகழஞ்சலி செலுத்தியுள்ளார்.
அம்பேத்கருக்கு மரியாதை
இந்திய அரசியலமைப்பின் தந்தையான அம்பேத்கரின் 64வது நினைவுநாள் இன்று அனுசரிக்கப்பட்டது. இதையடுத்து, நாடு முழுவதும் பல்வேறு தலைவர்களும் அவரது உருவப்படத்திற்கு மலர்தூவி மரியாதை செலுத்தினர். தி.மு.க. தலைவரும் சட்டப்பேரவை எதிர்க்கட்சித் தலைவருமான மு.க.ஸ்டாலின், திருவாரூரில் உள்ள மறைந்த முன்னாள் முதல்வர் கருணாநிதியின் இல்லத்தில் அம்பேத்கர் படத்துக்கு மாலை அணிவித்து மரியாதை செலுத்தினார். மேலும், தனது முகநூல் பக்கத்தில் மு.க.ஸ்டாலின் பதிவிட்டுள்ளதாவது:-
புதிய புத்தர்
இந்தியாவில் தோன்றிய அறிவுச் சூரியன்! இந்த நூற்றாண்டின் புதிய புத்தர்! ஒடுக்கப்பட்டோர் அனைவருக்குமான ஒளிவிளக்கு! எந்நாளும் எல்லோருக்குமான வழிகாட்டி! அம்பேத்கரின் நினைவுநாள் இன்று! அவர் காட்டிய சமூகநீதிப் பயணத்தில் தடம்மாறாது நடை போட்ட கருணாநிதியின் திருவாரூர் இல்லத்தில் அம்பேத்கர் படத்துக்கு மாலை அணிவித்து மரியாதை செலுத்தினேன்!சமூகநீதிச் சுடரை அணையாமல் காப்போம்!. இவ்வாறு அவர் பதிவிட்டுள்ளார்.