மதுராந்தகம் சட்டப்பேரவைத் தொகுதி இடைத்தேர்தலை முன்னிட்டு, தமிழக வெற்றிக் கழக வேட்பாளர் மரகதம் குமரவேலை ஆதரித்து கட்சித் தலைவரும் தமிழக முதலமைச்சருமான விஜய் இன்று தேர்தல் பரப்புரையில் ஈடுபடுகிறார்.
செங்கல்பட்டு மாவட்டம் மதுராந்தகம் தொகுதிக்கு உட்பட்ட ஆத்தூர் சுங்கச்சாவடி அருகே இன்று மாலை 3 மணியளவில் பரப்புரைப் பொதுக்கூட்டம் நடைபெறும் என்று தவெக தலைமை அறிவித்துள்ளது.
40 ஏக்கர் பரப்பளவில் ஏற்பாடு
விஜய்யின் பொதுக்கூட்டம் முதலில் அச்சிறுப்பாக்கம் வஜ்ரகிரி மலை அடிவாரத்தில் நடத்தத் திட்டமிடப்பட்டிருந்தது. கூட்ட நெரிசல் மற்றும் பாதுகாப்பு ஏற்பாடுகளைக் கருத்தில்கொண்டு, ஆத்தூர் சுங்கச்சாவடி அருகேயுள்ள சுமார் 40 ஏக்கர் பரப்பளவு கொண்ட இடத்துக்கு நிகழ்ச்சி மாற்றப்பட்டுள்ளது.
பொதுக்கூட்ட மேடை, வாகன நிறுத்துமிடம் மற்றும் பொதுமக்கள் அமரும் பகுதிகள் தனித்தனியாக அமைக்கப்பட்டுள்ளன. நிகழ்வையொட்டி காவல்துறையினரும் தவெக நிர்வாகிகளும் பாதுகாப்பு மற்றும் கூட்ட மேலாண்மைப் பணிகளை மேற்கொண்டுள்ளனர்.
மரகதம் குமரவேலுக்கு ஆதரவு
மதுராந்தகம் தனித் தொகுதியில் தவெக சார்பில் மரகதம் குமரவேல் போட்டியிடுகிறார். அவருக்கு ஆதரவாக வாக்கு சேகரிக்கும் விஜய், தனது ஆட்சியின் திட்டங்கள் மற்றும் தொகுதி வளர்ச்சிக்கான வாக்குறுதிகள் குறித்து பொதுக்கூட்டத்தில் பேசுவார் என எதிர்பார்க்கப்படுகிறது.
மதுராந்தகம் மற்றும் தாராபுரம் சட்டப்பேரவைத் தொகுதிகளுக்கான இடைத்தேர்தல் அக்டோபர் 6-ஆம் தேதி நடைபெறுகிறது. வாக்கு எண்ணிக்கை அக்டோபர் 9-ஆம் தேதி நடைபெறும்.
ஐந்துமுனைப் போட்டி
மதுராந்தகம் தொகுதியில் தவெக, திமுக, அதிமுக, மார்க்சிஸ்ட் கம்யூனிஸ்ட் கட்சி மற்றும் நாம் தமிழர் கட்சி ஆகியவை களத்தில் இருப்பதால் ஐந்துமுனைப் போட்டி நிலவுகிறது.
இடைத்தேர்தல் பரப்புரை தீவிரமடைந்துள்ள நிலையில், விஜய்யின் இன்றைய பொதுக்கூட்டம் மதுராந்தகம் அரசியல் களத்தில் முக்கியத்துவம் பெற்றுள்ளது.