புள்ளிப்பட்டியலில் முன்னேறியது மும்பை: ப்ளே ஆஃப் செல்லும் பந்தயத்தில் நீடிக்கிறது!!

ராஜஸ்தான் ராயல்ஸ் நிர்ணயித்த 91 ரன்கள் என்ற எளிய இலக்கை 8.2 ஓவரிகளில் எல்லாம் முடித்து 8 விக்கெட் வித்தியாசத்தில் அபார வெற்றி பெற்ற மும்பை இந்தியன்ஸ் அணி, பிளே ஆஃப் வாய்ப்பை தக்கவைத்துள்ளது.

ஐ.பி.எல். கிரிக்கெட்டின் 51-வது லீக் ஆட்டத்தில் 5 முறை சாம்பியனான மும்பை இந்தியன்ஸ் அணி, முன்னாள் சாம்பியனான ராஜஸ்தான் ராயல்ஸ் அணியுடன் நேற்று மோதியது. இதில் டாஸ் வென்ற மும்பை இந்தியன்ஸ் அணியின் கேப்டன் ரோகித் சர்மா முதலில் பந்துவீச்சினை தேர்வு செய்தார்.

இதையடுத்து ராஜஸ்தான் ராயல்ஸ் அணி முதலாவதாக பேட்டிங் செய்தது. தொடக்க ஆட்டக்காரர்களாக இவின் லீவிஸ் மற்றும் ஜெய்ஸ்வால் களமிறங்கினர். இதில் 4வது ஓவரில் ஜெய்ஸ்வால்(12) அவுட் ஆன நிலையில், அடுத்தடுத்து விக்கெட்டுகள் சரிய ஆரம்பித்தன.அணியில் அதிகபட்சமாக இவின் லீவிஸ் மட்டுமே 24 ரன்கள் அடித்திருந்தார். சஞ்சு சாம்சன்(3), ஷிவம் துபே(3), க்ளென் பிலிப்ஸ்(4) என வரிசையாக ஒற்றை இலக்க ரன்களை மட்டுமே எடுத்து விக்கெட்டுகள் சரிந்தன. இதனால் அணியின் ரன் ரேட் கணிசமாக குறைந்தது. டேவிட் மில்லர் 15 ரன்களில் எல்.பி.டபிள்யூ. முறையில் ஆட்டமிழந்தார். ராகுல் திவாட்டியா 12 ரன்களில் கேட்ச் ஆகி வெளியேறினார். இறுதியாக 20 ஓவர்களில் ராஜஸ்தான் அணி 9 விக்கெட்டுகளை இழந்து 90 ரன்கள் மட்டுமே எடுத்தது.

இதையடுத்து 91 ரன்கள் எடுத்தால் வெற்றி என்ற எளிய இலக்குடன் மும்பை அணி விளையாடியது.மும்பை இந்தியன்ஸ் அணியின் ரோகித் சர்மா, இஷான் கிஷன் ஆகியோர் தொடக்க வீரர்களாக களம் இறங்கினர். ரோகித் சர்மா 13 பந்தில் 22 ரன்கள் எடுத்து ஆட்டமிழந்தார். அடுத்து வந்த சூர்யகுமார் யாதவ் 8 பந்தில் 13 ரன்கள் எடுத்தார். 3-வது விக்கெட்டுக்கு இஷான் கிஷன் உடன் ஹர்திக் பாண்ட்யா ஜோடி சேர்ந்தார். இஷான் கிஷன் அதிரடி ஆட்டத்தை வெளிப்படுத்தினார். அவர் 25 பந்தில் 5 பவுண்டரி, 3 சிக்சருடன் 50 ரன்கள் அடிக்க மும்பை இந்தியன்ஸ் 8.2 ஓவரில் 2 விக்கெட் இழப்பிற்கு 94 ரன்கள் எடுத்து 8 விக்கெட் வித்தியாசத்தில் அபார வெற்றி பெற்றது.

இந்த வெற்றியின் மூலம் புள்ளிப்பட்டியலில் 7வது இடத்தில் இருந்த மும்பை இந்தியன்ஸ் அணி 5வது இடத்திற்கு விறுவிறுவென முன்னேறியுள்ளது. ராஜஸ்தான் ராயல்ஸ் அணி 7வது இடத்திற்கு கீழே இறங்கியுள்ளது. ப்ளே ஆப் சுற்றை உறுதி செய்யும் முக்கியமான போட்டியில் ராஜஸ்தான் அணி இதுபோன்ற மோசமான பேட்டிங்கை வெளிப்படுத்தியிருப்பது அந்த அணி ரசிகர்களுக்கு இடையே அதிர்ச்சியை ஏற்படுத்தியது.