நகோயா, ஜப்பான்: ஆசிய விளையாட்டு ஆடவர் 57 கிலோ ஃப்ரீஸ்டைல் மல்யுத்தப் போட்டியில் இந்தியாவின் அமன் செராவத் தங்கப்பதக்கம் வென்று அசத்தியுள்ளார். இறுதிப் போட்டியில் நடப்பு உலக சாம்பியனான வடகொரியாவின் ஹான் சோங் சோங்கை 11–7 என்ற புள்ளிக்கணக்கில் அவர் வீழ்த்தினார்.
பின்தங்கிய நிலையிலிருந்து மீண்டார்
போட்டியின் தொடக்கத்தில் அபாரமாகச் செயல்பட்ட அமன் 6–1 என முன்னிலை பெற்றார். அதன்பின்னர் பதிலடி கொடுத்த ஹான் சோங் சோங், தொடர்ச்சியாகப் புள்ளிகளைப் பெற்று 7–6 என முன்னிலைக்குச் சென்றார்.
ஆட்டம் கைவிட்டுப் போகும் நெருக்கடியான நிலையில் அமன் மீண்டும் ஆதிக்கம் செலுத்தினார். கடைசி நிமிடத்தில் மேற்கொண்ட சிறப்பான நகர்வுகளால் புள்ளிகளைக் குவித்து 11–7 என்ற கணக்கில் வெற்றியை உறுதி செய்தார்.
வெண்கலத்தைத் தொடர்ந்து தங்கம்
2023 ஹாங்சோ ஆசிய விளையாட்டில் இதே 57 கிலோ பிரிவில் அமன் வெண்கலப் பதக்கம் வென்றிருந்தார். தற்போது தனது பதக்கத்தைத் தங்கமாக மேம்படுத்தியுள்ளார். 2024 பாரீஸ் ஒலிம்பிக் போட்டியிலும் அவர் வெண்கலப் பதக்கம் வென்றது குறிப்பிடத்தக்கது.
ஆசிய விளையாட்டு ஆடவர் 57 கிலோ ஃப்ரீஸ்டைல் மல்யுத்தத்தில் தங்கம் வென்ற முதல் இந்திய வீரர் என்ற சாதனையையும் 23 வயதான அமன் படைத்துள்ளார். சுஜீத் கல்கல் ஏற்கெனவே ஆடவர் 65 கிலோ பிரிவில் முதலிடம் பிடித்த நிலையில், நடப்பு ஆசிய விளையாட்டில் இந்திய மல்யுத்த அணிக்குக் கிடைத்த இரண்டாவது தங்கம் இதுவாகும்.