பாலன்பூர்: மாதவிடாய் குறித்த தயக்கங்களை உடைத்து, பெண்கள் மற்றும் மாணவிகளுக்கு இலவசமாக சானிட்டரி நாப்கின்களை வழங்கிவரும் குஜராத்தைச் சேர்ந்த நயன் சத்ராரியாவின் சமூகப் பணி கவனம் பெற்றுள்ளது. ‘குஜராத்தின் பேட்மேன்’ என்று அழைக்கப்படும் இவரைச் சாதனையாளராக இந்தியா புக் ஆஃப் ரெக்கார்ட்ஸ் அங்கீகரித்துள்ளது.
24 மணி நேரமும் இலவசம்
பாலன்பூரில் தனது வீட்டுக்கு வெளியே ‘சானிட்டரி பேட் பரப்’ என்ற இலவச நாப்கின் மையத்தை நயன் அமைத்துள்ளார். பெண்கள் எந்தப் பதிவும் செய்யாமல், யாரிடமும் கேட்க வேண்டிய அவசியமின்றி, எந்த நேரத்திலும் இங்கிருந்து நாப்கின்களை எடுத்துச் செல்லலாம். பொதுமக்களின் நன்கொடைகள் மற்றும் தனது சொந்தப் பணத்தின் மூலம் நாப்கின்களைத் தொடர்ந்து நிரப்பி வருகிறார்.
476 கிராமங்களில் விழிப்புணர்வு
ஓவிய ஆசிரியராகவும் நிகழ்ச்சித் தொகுப்பாளராகவும் பணியாற்றும் நயன், 2022ஆம் ஆண்டு ஜனவரி முதல் மாதவிடாய் சுகாதாரம் குறித்து விழிப்புணர்வு ஏற்படுத்தி வருகிறார். வடக்கு குஜராத்தில் 476-க்கும் மேற்பட்ட கிராமங்களுக்குச் சென்று, 76 ஆயிரத்துக்கும் அதிகமான மாணவிகளைச் சந்தித்துள்ள அவர், இதுவரை 3.8 லட்சத்துக்கும் மேற்பட்ட சானிட்டரி நாப்கின்களை வழங்கியுள்ளதாக ஊடகத் தகவல்கள் தெரிவிக்கின்றன. தனது நிகழ்ச்சிகள் மூலம் கிடைக்கும் வருவாயில் 40 சதவீதத்தை இந்தச் சேவைக்குச் செலவிடுவதாகவும் கூறப்படுகிறது.
மாதவிடாய் காலத்திற்குத் தேவையான பொருட்கள், சரியான தகவல்கள் மற்றும் சுகாதார வசதிகள் கிடைப்பது உடல்நலம் மட்டுமின்றி கண்ணியம் மற்றும் சமத்துவத்துடனும் தொடர்புடையது என்று உலக சுகாதார நிறுவனம் குறிப்பிடுகிறது. சமூகத்தில் பேசத் தயங்கும் ஒரு பிரச்சினையைத் தனது தொடர் சேவையால் பொதுவெளிக்குக் கொண்டுவந்த நயன் சத்ராரியா, உண்மையான ‘சாதனை மனிதராக’ உயர்ந்து நிற்கிறார்.