இறுதியாண்டை தவிர்த்து மற்ற அனைத்து அரியர் தேர்வுகளும் தள்ளுபடி – முதலமைச்சர்

மாணவர்களின் கோரிக்கை ஏற்று கல்லூரி இறுதி செமஸ்டர் தேர்வு தவிர பிற செமஸ்டர் தேர்வுகளை ரத்து செய்து முதலமைச்சர் எடப்பாடி பழனிசாமி உத்தரவிட்டுள்ளார்.

இது தொடர்பாக முதலமைச்சர் வெளியிட்டுள்ள அறிக்கையில், “கொரோனா பரவல் காரணமாக, உயர்கல்வி பயிலும் மாணவர்களின் நலன் கருதி, தமிழக அரசால் அமைக்கப்பட்ட உயர்மட்டக் குழுவின் பரிந்துரையின் அடிப்படையிலும், பல்கலைக்கழக மானியக்குழு மற்றும் அகில இந்திய தொழில்நுட்பக் கல்விக் குழு ஆகியவற்றின் வழிகாட்டுதலின்படியும் மதிப்பெண்கள் வழங்கி இறுதியாண்டு தவிர்த்து மற்ற அனைத்து வருட மாணாக்கர்களின் தேர்வுகளும் ரத்து செய்யப்பட்டது.

அதன்படி, கலை மற்றும் அறிவியல், பொறியியல், தொழில்நுட்பம், தொழிற்படிப்பு, பட்டய படிப்பு மற்றும் எம்.சிஏ என அனைத்து துறையிலும் இறுதியாண்டு தவிர்த்து மற்ற அனைத்து மாணக்கர்களுக்கும் தேர்வில் இருந்து விலக்கு அளிக்கப்படுவதாக 23.7.2020 அன்று உத்தரவிட்டிருந்தேன். அதன் அடிப்படையில், உயர்கல்வித்துறை 27.7.2020 அன்று விரிவான வழிகாட்டுதல்களை வழங்கி அரசாணை வெளியிட்டது என முதலமைச்சர் தெரிவித்துள்ளார்

இந்நிலையில், தற்போது மாணவர்களின் கோரிக்கையை ஏற்று, அவர்களின் நலன் கருதி, தமிழக அரசால் அமைக்கப்பட்ட உயர்மட்ட குழுவின் பரிந்துரையின் அடிப்படையில், இறுதி பருவத் தேர்வுகளைத் தவிர பிற பருவப்பாடங்களின் 
தேர்வுக்கான கட்டணம் செலுத்தி, காத்திருக்கும் மாணாக்கர்களுக்கும் பல்கலைக்கழக மானியக்குழு மற்றும் அகில இந்திய தொழில்நுட்பக் கல்விக் குழு ஆகியவற்றின் வழிகாட்டுதலின்படி தேர்வு எழுதுவதிலிருந்து விலக்களித்து மதிப்பெண்கள் வழங்கப்படும். 

இது குறித்து விரிவான ஒரு அரசாணையை வெளியிட உயர்கல்வித் துறைக்கு நான் உத்தரவிட்டுள்ளேன்” என விளக்கமளித்துள்ளார்.