ஆக்ஸ்போர்டு பல்கலைகழக தடுப்பூசி சென்னையில் பரிசோதனை தமிழக அரசு அறிவிப்பு 300 பேர்களிடம் சோதனை நடத்தப்பட உள்ளது.
கொரோனா வைரசுக்கு எதிராக ஆக்ஸ்போர்டு பல்கலைகழகம் கண்டுபிடித்துள்ள தடுப்பூசியை சென்னையில் பரிசோதனை செய்யப்பட உள்ளதாக தமிழக அரசு அறிவித்துள்ளது. இந்த பரிசோதனை 300 பேர்களிடம் மேற்கொள்ளப்பட உள்ளது.
கொரோனா வைரஸ்
கொரோனா வைரசுக்கு எதிரான தடுப்பு மருந்து கண்டுபிடிக்கும் பணியில் பல்வேறு நாடுகளும் மும்முரமாக ஈடுபட்டு வருகிறது. ரஷ்யா கொரோனாவிற்கு எதிரான தடுப்பு மருந்தை கண்டுபிடித்துள்ளதாக ஏற்கனவே அறிவித்துள்ளது. லண்டனில் உள்ள ஆக்ஸ்போர்டு பல்கலைகழகமும் தடுப்பூசி கண்டுபிடிக்கும் பணிகளில் தீவிரமாக ஈடுபட்டு வருகிறது. இதுதவிர, இந்தியாவிலும் கோவாக்சின் தடுப்பு மருந்துக்கான பரிசோதனைகளும் நடைபெற்று வருகிறது. இந்த நிலையில்,
தமிழக அரசு இன்று வெளியிட்ட செய்திக்குறிப்பில் கூறியிருப்பதாவது:-
தமிழக அரசு ெகாரோனா வைரஸ் தொற்று சிகிச்சைகளைத் தொடர்ந்து வலுப்படுத்தி வருகிறது. தமிழகம் முழுவதும் அரசு மருத்துவமனைகளில் உள்கட்டமைப்பு வசதிகளும் தொடர்ந்து உயர்த்தப்பட்டு மருத்துவப் பணியாளர்கள் பணியமர்த்தப்பட்டுள்ளனர். ரெம்டெசிவிர், டோகிஜூமாப், ஈனோஷேபரின் போன்ற உயிர்காக்கும் வீரியம் மிக்க மருந்துகள் கொள்முதல் செய்யப்பட்டு தமிழ்நாட்டின் பல்வேறு பகுதிகளுக்கு அனுப்பப்பட்டு சிகிச்சை மேற்கொள்ளப்படுகிறது.
ஆக்ஸ்போர்டு தடுப்பூசி
மனித குலத்தை கொரோனா நோய்த்தொற்று தாக்குதலிலிருந்து பாதுகாக்க தடுப்பூசிகள் மட்டுமே பேருதவியாக இருக்கும் என்பது மருத்துவ நிபுணர்களின் கருத்து. பல்வேறு நாடுகள் கரோனாவிற்கு தடுப்பூசி கண்டுபிடிப்பதில் மும்முரமாக ஈடுபட்டுள்ளன. இங்கிலாந்தைச் சார்ந்த ஆக்ஸ்போர்டு பல்கலைக்கழகமும் ஒரு தடுப்பூசியைக் கண்டுபிடித்து இந்தத் தடுப்பூசியை ஆரோக்கியமான நபர்களுக்குச் செலுத்தி நோய் எதிர்ப்புத் திறனைக் கண்டறியும் ஆராய்ச்சிகள் முழுவீச்சில் நடைபெற்று வருகின்றன.
சென்னையில் பரிசோதனை
இந்தத் தடுப்பூசி கொரோனா வைரஸ் தொற்றைத் தடுக்கும் வல்லமை வாய்ந்ததாக அமையும் என்பது உலக அளவில் மருத்துவ நிபுணர்களின் எதிர்பார்ப்பாக உள்ளது. இதன் ஒரு பகுதியாக, இந்திய அளவில், தடுப்பூசியைச் சோதனை செய்ய இந்திய மருத்துவ ஆராய்ச்சி கவுன்சில் மற்றும் இந்திய மருந்துக் கட்டுப்பாட்டு வாரியம் சென்னையைத் தேர்வு செய்துள்ளது. தமிழ்நாடு அரசின் பொது சுகாதாரம் மற்றும் நோய்த் தடுப்பு மருந்துத்துறை இயக்குநர் முதன்மை ஆய்வாளராக நியமிக்கப்பட்டுள்ளார். இந்த ஆய்வு 18 வயதிற்கு மேற்பட்ட ஆரோக்கியமான நபர்களிடம் மேற்கொள்ளப்படும். இந்த ஆராய்ச்சியை சென்னை சேத்துப்பட்டில் அமைந்துள்ள தேசிய காசநோய் ஆராய்ச்சிக் கழகமும், இந்திய மருத்துவ ஆராய்ச்சிக் கழகமும் இணைந்து மேற்கொள்ளும்.
300 பேர்களிடம் சோதனை
சென்னையைப் பொறுத்தவரையில் இந்த கோவிஷீல்டு தடுப்பூசி ராஜீவ் காந்தி அரசு பொது மருத்துவமனை மற்றும் போரூர் ராமச்சந்திரா மருத்துவமனை ஆகிய இரண்டு இடங்களிலும் சுமார் 300 பேர்களிடம் செலுத்தி சோதனை நடத்தப்பட உள்ளது. இந்தத் தடுப்பூசி டி-செல்கள் என்று அழைக்கப்படும் வெள்ளை அணுக்களை 14 நாட்களில் மனித உடலில் உருவாக்கும். இந்த வெள்ளை அணுக்கள் மனிதர்களின் உடலில் கொரோனா வைரஸால் பாதிக்கப்பட்ட செல்கள் மீது தாக்குதல் தொடுத்து உடனடியாக அதனை அழித்துவிடும். மேலும், 28 நாட்களுக்குள் நோய் எதிர்ப்புச் சக்தியையும் உடலில் உருவாக்கிவிடும். இரண்டாம் கட்ட ஆராய்ச்சியைத் தொடர்ந்து மூன்றாம் கட்ட ஆராய்ச்சி நடத்தப்பட்டு தடுப்பு மருந்து பயன்பாட்டிற்கு வெகு விரைவில் கொண்டு வரப்படும். முதல்வரின் மக்கள்நலன் காக்கும் பணிகள் கொரோனா தடுப்பை மேலும் வலுப்படுத்துவதாக அமையும்.இவ்வாறு அதில் தெரிவிக்கப்பட்டுள்ளது.