அரசு ஊழியர்களுக்கு எதற்காக சங்கங்கள் என்றும், அந்தச் சங்கங்களை அமைக்க யார் அவர்களுக்கு அதிகாரம் கொடுத்தது என்றும் உயர் நீதிமன்ற மதுரைக் கிளை சரமாரியாக கேள்வி எழுப்பியுள்ளது.
அரசு அலுவலகத்தில் ஊழியராக பணிபுரியும் ஒருவர், தான் ஒரு அரசு ஊழியர் என்பதை மறைத்து, இலவச வீட்டு மனைப்பட்டாவை பெற்றது தொடர்பாக வழக்கு ஒன்று தொடரப்பட்டது. இன்று இந்த வழக்கு விசாரணைக்கு வந்தது. இந்த வழக்கை விசாரித்த நீதிபதிகள் கிருபாகரன், புகழேந்தி ஆகியோர் அடங்கிய அமர்வு, இலவச வீட்டு மனைப்பட்டா பெற்ற அரசு ஊழியர் மீது என்ன நடவடிக்கை எடுக்கப்பட்டது என்றும், அவர் மீது புகார் அளிக்கப்பட்டும் ஏன் முதல் தகவல் அறிக்கை பதிவு செய்யவில்லை என்றும் கேள்வி எழுப்பினர். இதற்கு பதிலளித்த அரசு தரப்பு வக்கீல், அந்த ஊழியர் பணியிடை நீக்கம் செய்யப்பட்டதாக தெரிவித்தார்.
மேலும், முறைகேடுகளில் ஈடுபடும் அரசு ஊழியர்களின் மொத்த சொத்துகளும் பறிமுதல் செய்யப்பட வேண்டும். அப்போதுதான் முறைகேடுகள் போன்ற குற்றங்கள் தடுக்கப்படும் என்று உயர் நீதிமன்ற மதுரைக் கிளை நீதிபதிகள் கருத்துத் தெரிவித்துள்ளனர்.
மக்களுக்கு இடையூறு ஏற்படுத்தும் அரசியல்வாதிகள், அரசு ஊழியர்கள், அமைப்பு தலைவர்கள் சமூகத்திற்கு எதிரானவர்களாக கருதப்பட வேண்டும் என்றும், மக்கள் வரிப்பணத்தில் ஊதியம் பெறும் அரசு அதிகாரிகள் முதலில் தங்கள் பணியை முறையாக செய்ய வேண்டும் என்றும் காட்டமாக தெரிவித்துள்ளனர்.
மேலும், அரசு ஊழியர்களுக்கு எதற்காக சங்கங்கள்? அவற்றை அமைக்க அவர்களுக்கு யார் அதிகாரம் கொடுத்தது? என்றும் நீதிபதிகள் கேள்விகளை எழுப்பினர். மக்களின் வரிப்பணத்தில் ஊதியம் பெறும் அரசு ஊழியர்கள், தங்களது பணியை முறையாக மேற்கொள்ள வேண்டும் என்றும் கூறியுள்ளனர்.