பெயரில் ‘Whale’ இருந்தாலும் திமிங்கலம் அல்ல; 40 அடிக்கும் மேல் வளரும் கடலின் பிரம்மாண்ட உயிரினம் — அழிவின் அபாயத்திலும் Whale Shark
கடலில் வாழும் மிகப்பெரிய மீன் எது என்று கேட்டால் ‘திமிங்கலம்’ என்று பலரும் நினைக்கலாம். ஆனால் திமிங்கலம் மீன் அல்ல; அது ஒரு பாலூட்டி. உலகில் தற்போது வாழும் மீன்களிலேயே மிகப்பெரியது Whale Shark — திமிங்கலச் சுறா. இந்த பிரம்மாண்ட கடல்வாழ் உயிரினத்தின் பாதுகாப்பு குறித்த விழிப்புணர்வை ஏற்படுத்தும் வகையில் ஆண்டுதோறும் ஆகஸ்ட் 30-ஆம் தேதி International Whale Shark Day கடைப்பிடிக்கப்படுகிறது.
எவ்வளவு பெரியது?
Whale Shark-ன் அறிவியல் பெயர் Rhincodon typus. NOAA தகவலின்படி, இவை பொதுவாக 40 அடிக்கும் மேல் வளரக்கூடியவை. WWF தகவலின்படி மிகப்பெரிய Whale Shark-கள் சுமார் 60 அடி வரை வளரக்கூடும். உலகில் தற்போது வாழும் மீன் இனங்களில் இதுவே மிகப்பெரியது. உலகின் இரண்டாவது மிகப்பெரிய மீனும் ஒரு சுறாதான் — Basking Shark.
இவ்வளவு பெரிய சுறா மனிதர்களை வேட்டையாடுமா?
அதன் பிரம்மாண்டமான உருவத்தைப் பார்த்து அஞ்சத் தேவையில்லை. Whale Shark பெரும்பாலும் plankton, சிறிய மீன்கள், மீன் முட்டைகள் உள்ளிட்ட சிறிய உயிரினங்களை உணவாகக் கொள்கிறது. தண்ணீரை வாய்க்குள் எடுத்துக்கொண்டு அதிலுள்ள சிறிய உணவுப் பொருட்களை வடிகட்டி உண்ணும் filter feeder வகையைச் சேர்ந்தது. இதன் காரணமாக Whale Shark-கள் பொதுவாக ‘gentle giants’ என்றும் குறிப்பிடப்படுகின்றன.
ஒவ்வொன்றுக்கும் தனித்தனி ‘அடையாள அட்டை’!
Whale Shark-ன் உடல் முழுவதும் வெள்ளை அல்லது மஞ்சள் நிறப் புள்ளிகள் மற்றும் கோடுகள் காணப்படும். இதில் சுவாரசியம் என்னவென்றால், ஒவ்வொரு Whale Shark-ன் புள்ளி அமைப்பும் தனித்துவமானது. மனிதர்களின் கைரேகையைப் போல இந்த pattern-ஐ வைத்து தனித்தனி Whale Shark-களை ஆராய்ச்சியாளர்கள் அடையாளம் காண முடியும்.
ஆயிரம் மீட்டர் ஆழத்துக்கும் செல்லும்!
Whale Shark-கள் உலகின் வெப்பமண்டலக் கடல்களில் பரவலாகக் காணப்படுகின்றன.
உணவைத் தேடி நீண்ட தொலைவுக்கு இடம்பெயரும் இவை, கடலின் மேற்பரப்பில் உணவு தேடுவதுடன் சுமார் 1,000 மீட்டர் ஆழத்திற்கும் டைவ் செய்யக்கூடியவை என WWF குறிப்பிடுகிறது. (World Wildlife Fund)
இவற்றின் வாழ்க்கை குறித்த பல மர்மங்களுக்கு விஞ்ஞானிகளிடம் இன்னும் முழுமையான பதில் இல்லை. குறிப்பாக இவை எங்கு குட்டிகளை ஈனுகின்றன என்பது இன்னும் முழுமையாக அறியப்படவில்லை.
இந்தியாவுக்கும் Whale Shark-க்கும் தொடர்பு
இந்தியக் கடற்பகுதிகளிலும் Whale Shark காணப்படுகிறது. குறிப்பாக குஜராத் கடற்கரை Whale Shark ஆய்வு மற்றும் பாதுகாப்பில் முக்கிய இடமாக உள்ளது.
இந்தியாவில் Whale Shark-க்கு 2001 முதல் சட்டப்பூர்வ பாதுகாப்பு அளிக்கப்பட்டுள்ளதாக Wildlife Institute of India ஆவணங்கள் குறிப்பிடுகின்றன. குஜராத் கடற்பகுதியில் Whale Shark-களின் இடம்பெயர்வைப் புரிந்துகொள்வதற்கான ஆராய்ச்சி மற்றும் பாதுகாப்பு முயற்சிகளும் மேற்கொள்ளப்பட்டுள்ளன.
பாதுகாக்க வேண்டிய கடலின் பிரம்மாண்டம்
பிரம்மாண்டமான உடல் அமைப்பைக் கொண்டிருந்தாலும் Whale Shark-களின் எண்ணிக்கை பல பகுதிகளில் குறைந்து வருவதாக பாதுகாப்பு அமைப்புகள் எச்சரிக்கின்றன. மீன்பிடி நடவடிக்கைகளில் எதிர்பாராமல் சிக்குவது உள்ளிட்ட மனித நடவடிக்கைகள் அவற்றுக்கு அச்சுறுத்தலாக உள்ளன.
Whale Shark போன்ற உயிரினங்களைப் பாதுகாப்பது ஒரு மீன் இனத்தை மட்டும் பாதுகாப்பதல்ல; கடல்சார் உயிரியல் பன்முகத்தன்மையையும் பாதுகாப்பதாகும்.
ஆகஸ்ட் 30 — International Whale Shark Day, கடலின் இந்த பிரம்மாண்ட ‘gentle giant’-ஐ அறிந்துகொள்வதற்கும் பாதுகாப்பதன் அவசியத்தை நினைவூட்டுவதற்குமான நாள்.