ஜெனீவா: உலக சுகாதார அமைப்பின் அடுத்த தலைமை இயக்குநர் பதவிக்கான போட்டியில் தனது வேட்பாளரை நிறுத்த சீனா திட்டமிட்டுள்ளதாகத் தகவல் வெளியாகியுள்ளது. அமெரிக்கா உலக சுகாதார அமைப்பிலிருந்து விலகியுள்ள நிலையில், இந்த நடவடிக்கை சர்வதேச அளவில் கவனம் பெற்றுள்ளது.
சாங் லியை நிறுத்தத் திட்டம்
தாய்–சேய் நலக் கொள்கைகள் மற்றும் சர்வதேச ஒத்துழைப்பில் 20 ஆண்டுகள் அனுபவமுள்ள சீன மூத்த பொது சுகாதார அதிகாரி சாங் லியை வேட்பாளராக நிறுத்த சீனா திட்டமிட்டுள்ளதாக நான்கு தூதர்கள் மற்றும் விவரம் அறிந்த ஒருவர் Reuters-க்கு தெரிவித்துள்ளனர்.
எனினும், சாங் லியின் வேட்புமனு குறித்து சீன அரசு அல்லது ஜெனீவாவில் உள்ள சீனத் தூதரகம் இதுவரை அதிகாரப்பூர்வ அறிவிப்பை வெளியிடவில்லை. Reuters எழுப்பிய கேள்விகளுக்கும் உடனடியாகப் பதில் அளிக்கப்படவில்லை.
அமெரிக்கா விட்ட இடத்தை நிரப்புமா சீனா?
அமெரிக்கா விலகியதைத் தொடர்ந்து உலக சுகாதார அமைப்பு தனது மிகப்பெரிய நிதி ஆதரவாளரை இழந்துள்ளது. இதனால் அமைப்பின் செயல்பாடுகள் குறைக்கப்பட்டதுடன், நிர்வாகப் பதவிகள் மற்றும் ஆயிரக்கணக்கான வேலைகளும் குறைக்கப்பட்டுள்ளன.
இந்தச் சூழலில், ஐ.நா. அமைப்புகள் உள்ளிட்ட சர்வதேச அமைப்புகளில் தனது செல்வாக்கை அதிகரிக்க சீனா முயல்வதன் ஒரு பகுதியாக இந்த வேட்பாளர் தேர்வு பார்க்கப்படுகிறது. உலக சுகாதார அமைப்புக்குக் கூடுதல் நிதி வழங்குவதாக சீனா அறிவித்திருந்தாலும், அமெரிக்கா விலகியதால் ஏற்பட்ட நிதிப் பற்றாக்குறை முழுமையாக நிரப்பப்படவில்லை.
போட்டியில் ஆறு நாடுகள்
சவுதி அரேபியா, பெல்ஜியம், கத்தார், போட்ஸ்வானா, இந்தோனேசியா மற்றும் ஸ்பெயின் ஆகிய நாடுகளைச் சேர்ந்த ஆறு பேர் தங்களது வேட்பாளர் விவரங்களை ஏற்கெனவே பொதுவெளியில் அறிவித்துள்ளனர்.
வேட்பாளர்களின் முழுப் பட்டியலை இறுதி மண்டலக் குழுக் கூட்டங்களுக்குப் பிறகு நவம்பர் தொடக்கத்தில் உலக சுகாதார அமைப்பு அதிகாரப்பூர்வமாக வெளியிடவுள்ளது.
மே 2027-ல் இறுதித் தேர்வு
உலக சுகாதார அமைப்பின் நிர்வாகக் குழு 2027 ஜனவரியில் அதிகபட்சமாக மூன்று வேட்பாளர்களை இறுதிப் பட்டியலுக்குத் தேர்வு செய்யும். அதிலிருந்து புதிய தலைமை இயக்குநரை 2027 மே மாதம் நடைபெறும் உலக சுகாதாரப் பேரவை தேர்ந்தெடுக்கும்.
தற்போதைய தலைமை இயக்குநர் டெட்ரோஸ் அதானோம் கெப்ரேயசஸின் இரண்டாவது பதவிக்காலம் 2027 ஆகஸ்ட் 15ஆம் தேதியுடன் முடிவடைகிறது. புதிய தலைமை இயக்குநர் ஆகஸ்ட் 16ஆம் தேதி பொறுப்பேற்பார் என WHO தேர்தல் கால அட்டவணையில் தெரிவிக்கப்பட்டுள்ளது.
சாங் லி தேர்வு செய்யப்பட்டால், மார்கரெட் சானுக்குப் பிறகு உலக சுகாதார அமைப்பை வழிநடத்தும் இரண்டாவது சீன நாட்டவர் என்ற பெருமையைப் பெறுவார்.