மோடி–டஸ்க் சந்திப்பு: இந்தியா–போலந்து வர்த்தகத்தை இரட்டிப்பாக்க இலக்கு!

புதுடெல்லி, அக். 22: இந்தியா–போலந்து இடையிலான வர்த்தகத்தை 2030-ஆம் ஆண்டுக்குள் இரட்டிப்பாக்கவும், பாதுகாப்பு, விண்வெளி மற்றும் அணுசக்தித் துறைகளில் ஒத்துழைப்பை விரிவுபடுத்தவும் இரு நாடுகளும் முடிவு செய்துள்ளன. பிரதமர் நரேந்திர மோடி, போலந்து பிரதமர் டொனால்ட் டஸ்க் இடையே டெல்லியில் இன்று நடைபெற்ற பேச்சுவார்த்தையில் இந்த முடிவுகள் எடுக்கப்பட்டன.

மூன்று நாள் அரசுமுறைப் பயணமாக இந்தியா வந்துள்ள டொனால்ட் டஸ்க், ஹைதராபாத் இல்லத்தில் பிரதமர் மோடியைச் சந்தித்தார். இருதரப்பு உறவுகள், வர்த்தகம், முதலீடு மற்றும் சர்வதேச நிலவரங்கள் குறித்து இரு தலைவர்களும் ஆலோசித்தனர்.

பாதுகாப்புத் துறையில் கூட்டு உற்பத்தி

பாதுகாப்பு, விண்வெளி, அணுசக்தி உள்ளிட்ட துறைகளில் இந்தியாவுடன் இணைந்து தொழில்நுட்பங்களை உருவாக்கவும், கூட்டு உற்பத்தியில் ஈடுபடவும் போலந்து நிறுவனங்களுக்கு பிரதமர் மோடி அழைப்பு விடுத்தார். பாதுகாப்புத் தொழில் ஒத்துழைப்புக்கெனத் தனிப் பேச்சுவார்த்தை அமைப்பை ஏற்படுத்தவும் இரு நாடுகளும் ஒப்புக்கொண்டுள்ளன.

முக்கியக் கனிமங்கள், நிலக்கரியை வாயுவாக்கும் தொழில்நுட்பம், செயற்கை நுண்ணறிவு மற்றும் பசுமைத் தொழில்நுட்பங்களிலும் ஒத்துழைப்பை மேம்படுத்துவது குறித்து விவாதிக்கப்பட்டது.

2030-க்குள் வர்த்தகத்தை இரட்டிப்பாக்க முடிவு

இரு நாடுகளின் வர்த்தகத்தை 2030-ஆம் ஆண்டுக்குள் இரட்டிப்பாக்க இணைந்து செயல்பட முடிவு செய்யப்பட்டுள்ளது. ரயில்வே, போக்குவரத்து, மேம்பட்ட உற்பத்தி, உணவுப் பதப்படுத்துதல் மற்றும் உயிரித் தொழில்நுட்பத் துறைகளில் போலந்து முதலீடுகளை ஈர்ப்பதற்கான வாய்ப்புகளும் பேச்சுவார்த்தையில் இடம்பெற்றன.

பயங்கரவாத எதிர்ப்பு நடவடிக்கைகள் குறித்துப் பேச்சுவார்த்தை நடத்தவும் இரு நாடுகளும் ஒப்புக்கொண்டுள்ளன. பேரிடரைத் தாங்கும் உள்கட்டமைப்புக்கான சர்வதேசக் கூட்டமைப்பில் போலந்து இணைந்துள்ளதும் தெரிவிக்கப்பட்டது.

உக்ரைன், மேற்கு ஆசிய அமைதி குறித்து ஆலோசனை

ரஷ்யா–உக்ரைன் போர் மற்றும் மேற்கு ஆசிய நிலவரம் குறித்தும் இரு தலைவர்களும் கருத்துகளைப் பரிமாறிக்கொண்டனர். பேச்சுவார்த்தை மற்றும் தூதரக முயற்சிகள் மூலம் மோதல்களுக்குத் தீர்வுகாண வேண்டும் என்ற இந்தியாவின் நிலைப்பாட்டை மோடி வலியுறுத்தினார்.

கடந்த 2024-ஆம் ஆண்டு மோடி போலந்து சென்றபோது, இரு நாடுகளின் உறவு உத்திசார் கூட்டாண்மை நிலைக்கு உயர்த்தப்பட்டது. அதன் தொடர்ச்சியாக, தற்போதைய சந்திப்பில் பொருளாதாரம் மற்றும் தொழில்நுட்ப ஒத்துழைப்பை விரிவுபடுத்துவதற்கு முக்கியத்துவம் அளிக்கப்பட்டுள்ளது.