ஜேஎஸ்கே பிலிம் கார்பரேசன் நிறுவனம் சார்பில் உருவாக்கப்பட்டுள்ள அண்டாவ காணோம் படம் வரும் 28 ஆம் தேதி முத ஜேஎஸ்கே பிரைம் மீடியா ஓடிடி தளத்தில் வெளியாக இருப்பதாக அதிகாரப்பூர்வமாக அறிவிக்கப்பட்டுள்ளது.
நாடு முழுவதும் பாதிப்பை ஏற்படுத்திய கொரோனா காரணமாக திரையரங்குகள் மூடப்பட்டுள்ளன. மேலும், படப்பிடிப்புகளும் நிறுத்தப்பட்டுள்ளது.
இதன் விளைவாக தளபதி விஜய்யின் மாஸ்டர், தனுஷின் ஜகமே தந்திரம் ஆகிய படங்கள் உள்பட புதிய படங்களின் ரிலீஸ் தேதி தள்ளி வைக்கப்பட்டுள்ளது. எனினும், பொன்மகள் வந்தாள், பென்குயின் உள்ளிட்ட ஒரு சில படங்கள் ஓடிடி தளத்தில் அமேசான் பிரைம் வீடியோவில் வெளியிடப்பட்டுள்ளது.
தற்போது உருவாக்கப்பட்டுள்ள குறைந்த பட்ஜெட் படங்களும் ஓடிடி தளத்தில் வெளியாக இருக்கிறது. அந்த வகையில், அண்டாவ காணோம் படமும் ஓடிடி தளத்தில் வெளியாக இருக்கிறது. இந்தப் படத்தை தயாரித்துள்ள ஜேஎஸ்கே பிலிம் கார்பரேசன் தனது ஜேஎஸ்கே பிரைம் மீடியா என்ற பெயரிலேயே ஓடிடி ஆப் ஒன்றை உருவாக்கியுள்ளது.
அதில், அண்டாவ காணோம் படத்தை வெளியிடுகிறது. வரும், 28 ஆம் தேதி வெள்ளியன்று அண்டாவ காணோம் படம் வெளியாகிறது. இந்தப் படத்தில், திமிரு படத்தில் விஷால் உடன் இணைந்து நடித்த ஸ்ரேயா ரெட்டி, நடித்துள்ளார். மேலும், வினோத் முன்னா, முனீஷ்காந்த், நவீனா, இளையராஜா ஆகியோர் பலர் நடித்துள்ளனர். விஜய் சேதுபதி இந்தப் படத்தில் அண்டாவுக்கு குரல் கொடுத்துள்ளார் என்பது குறிப்பிடத்தக்கது.
அறிமுக இயக்குநர் வேல்மதி இந்தப் படத்தை இயக்கியுள்ளார். முழுக்க முழுக்க காமெடி கதையை மையப்படுத்தி அண்டாவ காணோம் படம் உருவாக்கப்பட்டுள்ளது. அஸ்வாமித்ரா இந்தப் படத்திற்கு இசையமைத்துள்ளார் என்பது குறிப்பிடத்தக்கது.