இந்தியில் அட்லீ இயக்கத்தில் ஷாரூக்கான், நயன்தாரா, சானியா மல்ஹோத்ரா நடிப்பில் உருவாகி வரும் படத்தின் தலைப்பு, டீசர் வெளியீட்டுடன் அதிகாரப்பூர்வமாக அறிவிக்கப்பட்டுள்ளது.
ஷாரூக்கானின் சொந்த நிறுவனமான ரெட் சில்லீஸ் தயாரிக்கும் படத்தை இயக்குவதற்கு தமிழ் சினிமாவைச் சேர்ந்த இயக்குநர் அட்லீ ஒப்பந்தம் செய்யப்பட்டார். இந்த படத்தில் ஷாரூக்கான் ஹீரோவாக நடிக்கும் நிலையில், கதாநாயகியாக நயன்தாரா மற்றும் சானியா மல்ஹோத்ரா ஒப்பந்தம் செய்யப்பட்டனர்.
இப்படத்தின் முதற்கட்ட படப்பிடிப்பு மஹாராஷ்டிரா மாநிலம் புனேவில் துவங்கியது. கொரோனா இரண்டாம் அலை காலக்கட்டத்துக்கு இடையில் மிகவும் கட்டுப்பாடுகளுடன் படப்பிடிப்பு நடத்தப்பட்டது. எனினும் படத்தின் தலைப்பு உள்ளிட்ட விபரங்கள் வெளியிடாமல் ரகசியம் காக்கப்பட்டது.
இதற்கிடையில் ஷாரூக்கானின் மகன் போதை வழக்கில் கைது செய்யப்பட்டார். அதனால் படப்பிடிப்பு சில மாதங்கள் தாமதமாகின. தற்போது படத்தின் படப்பிடிப்பு மீண்டும் விறுவிறுப்புடன் துவங்கியுள்ளது. அதை உறுதி செய்யும் விதமாக படத்தின் தலைப்பு டீசருடன் இன்று வெளியாகும் என்று தகவல்கள் வெளியாகின.
இந்நிலையில் தன்னுடைய சமூகவலைதள பக்கத்தில் ஷாரூக்கான் படத்தின் டீசர் மற்றும் தலைப்பை வெளியிட்டுள்ளார். அதன்படி படத்துக்கு ஜவான் என்று பெயரிடப்பட்டுள்ளது. இந்தியில் நேரடியாகவும் தமிழ், தெலுங்கு, மலையாளம், கன்னடம் மற்றும் இந்தி மொழிகளில் மொழிமாற்றம் செய்யப்பட்டு இப்படம் வெளியாகிறது.
மிகவும் விறுவிறுப்பாக உருவாகியுள்ள ‘ஜவான்’ படத்தின் டீசர், ரசிகர்களிடையே மிகவும் வரவேற்பை பெற்றுள்ளது.