புதிய இணையதளத்தில் 23,000 உயர்கல்வி படிப்புகளை இலவசமாக படிக்கலாம் என்று யுஜிசி அறிவித்துள்ளது.
வரும் கல்வியாண்டில் பல்கலைக்கழக மானியக்குழு (யுஜிசி) 23,000க்கும் மேற்பட்ட உயர்கல்வி படிப்புகளை புதிய இணையதளம் ஒன்றில் இலவசமாக அளிக்கிறது. இந்த இணையதளம் தேசியக் கல்வி கொள்கையின் இரண்டாம் ஆண்டு நிறைவையொட்டி இன்று தொடங்கப்படுகிறது.
செயற்கை நுண்ணறிவு, இணைய பாதுகாப்பு, பச்சிளம் குழந்தைகள் பராமரிப்பு உள்ளிட்டவை இந்த படிப்புகளில் அடங்கும். கிராமப்புற மாணவர்களுக்கும் உயர்கல்வி சென்று சேரவேண்டும் என்ற உயரியநோக்கில் இத்திட்டம் தொடங்கப்படுகிறது. இதற்காக, மத்திய மின்னணு மற்றும் தகவல் தொழிற்நுட்ப அமைச்சகத்துடன் பல்கலைக் கழக மானியக்குழு ஒப்பந்தம் செய்து கொண்டுள்ளது. இந்த அமைச்சகத்தின் கீழ் இயங்கும் 7 லட்சத்து 50 ஆயிரம் பொது சேவை மையங்கள் மூலம் இந்த படிப்புகளை மாணவர்கள் இலவசமாக பெறலாம். ஆனால், பொதுசேவை மையங்களின் கட்டமைப்பை பயன்படுத்துவதால் ₹500 கட்டணமாக செலுத்த வேண்டி இருக்கும் என யுஜிசி தெரிவித்துள்ளது.