இந்தியாவில் பிறந்து அமெரிக்காவுக்கு குடிபெயர்ந்த, இந்திய வம்சாவளிப் பெண்ணான ஃபால்குனி ஷாவுக்கு கிராமி விருது அறிவிக்கப்பட்டு வழங்கப்பட்டுள்ளது.
மும்பையில் பிறந்தவரான ஃபால்குனி ஷா இந்துஸ்தானி வகையைச் சேர்ந்த ஹரானா என்ற பாராம்பரிய இசையை கற்றார். மேலும் பாடகர் மற்றும் சாரங்கி இசைக்கலைஞரான உஸ்தாத் சுல்தான் கானிடமும் இசை பயின்றுள்ளார். இவரால் சாரங்கி இசைக்கருவியையும் வாசிக்க முடியும்.
ஏ.ஆர். ரஹ்மான் இசையமைத்த ஸ்லம்டாக் மில்லியனர் படத்திலும் இவர் பாடியுள்ளார். நியூயார்க்குக்கு குடிபெயர்ந்த அவர், இசைக்குழு ஒன்றை சொந்தமாக வைத்துள்ளார். கடந்தாண்டு ‘ஏ கலர்ஃபுல் வேர்ல்டு’ என்கிற குழந்தைகளுக்கான இசை ஆல்பத்தை வெளியிட்டார்.
இந்நிலையில் இன்று நடைபெற்ற 64-வது கிராமி விருதுகள் வழங்கும் விழாவில் ‘ஏ கலர்ஃபுல் வேர்ல்டு’ ஆல்பத்துக்கு சிறந்த குழந்தைகளுக்கான ஆல்பம் பிரிவில் விருது வென்றது. இசைத்துறையினருக்கான உயரிய விருதாக கருதப்படும் கிராமி விருது வழங்கும் விழாவில் ஏ.ஆர். ரஹ்மான் தனது மகன் அமினுடன் கலந்துகொண்டார் என்பது குறிப்பிடத்தக்கது.