By எச்.வசந்தகுமாரின் படத்திற்கு மரியாதை செலுத்தும் நிகழ்ச்சிக்கு அழைக்கப்படாததை கண்டித்து, அகந்தை காரணமாக கட்சிபலவீனமாகக்கூடாது என்று தமிழக காங்கிரசுக்கு குஷ்பு கண்டனம் தெரிவித்துள்ளார்.
அழைக்கவில்லை:
கொரோனா தொற்றால் மருத்துவமனையில் அனுமதிக்கப்பட்டு, உடல்நலக்குறைவால் உயிரிழந்த கன்னியாகுமரியின் எம்.பி. வசந்தகுமாரின் படத்திற்கு இன்று தி.மு.க. தலைவர் மு.க.ஸ்டாலின் மாலை அணிவித்து அஞ்சலி செலுத்தினார். இந்த நிகழ்ச்சியில் அக்கட்சியின் தேசிய செய்தித்தொடர்பாளர் குஷ்பு பங்கேற்கவில்லை. அவரை இந்த நிகழ்விற்கு அழைக்கவில்லை என்று தகவல்கள் வெளியாகியுள்ளது.
குஷ்பு கண்டனம்:
இதையடுத்து, வசந்தகுமார் படத்திற்கு மு.க.ஸ்டாலின் மாலை அணிவித்த படத்தை தனது டுவிட்டர் பக்கத்தில் பதிவிட்டுள்ள நடிகை குஷ்பு, உயர்வான செயல். ஆனால், இந்திய தேசிய காங்கிரஸ் கட்சியின் தமிழ்நாட்டுப் பிரிவில் யாருக்குமே இது பற்றிய தகவல் சொல்லப்படவில்லை. தமிழகத்தில் இருக்கும் ஒரே தேசிய செய்தித் தொடர்பாளர் நான்தான். ஆனால் நான் இந்தத் தகவலைச் செய்தித்தாள்கள் மூலமாகத் தெரிந்து கொள்கிறேன். நாம் நம் வலிமையை அதிகரிக்க வேண்டும். நமது பாதுகாப்பற்ற மனநிலை, அகந்தை காரணமாக பலவீனமாக்கக் கூடாது. எப்போது அதைச் செய்வோம்? இவ்வாறு அவர் பதிவிட்டுள்ளார். கடந்த சில தினங்களுக்கு முன்பு, புதிய கல்விக்கொள்கை தொடர்பாக குஷ்பு தெரிவித்திருந்த கருத்து பெரும் சர்ச்சையை ஏற்படுத்தியது என்பது குறிப்பிடத்தக்கது.
