ஸ்டொய்னிஸ் அதிரடி அரைசதம் :ஆர்.சி.பி.அணிக்கு 197 ரன்கள் இலக்கு

ஸ்டொய்னிஸ் அதிரடி அரைசதத்தால் டெல்லி அணி 196 ரன்கள் அடித்து பெங்களூர் அணிக்கு 197 ரன்கள் இலக்காக வழங்கியது.

டெல்லி கேபிட்டல்ஸ் அணிக்கு எதிரான இன்றைய ஆட்டத்தில் விராட் கோலி தலைமையிலான ராயல் சேலஞ்சர்ஸ் பெங்களூர் அணி டாஸ் வென்று பந்து வீச்சை தேர்வு செய்தது.அதனை தொடர்ந்து டெல்லி அணி சார்பில் தொடக்க வீரர்களாக பிரித்திவி ஷா,தவான் களம் இறங்கினர்.ஆரம்பம் முதல் இருவரும் அதிரடி காட்ட டெல்லி அணி 6 ஓவர் முடிவில் 63 ரன்கள் எடுத்து இருந்தது.அரை சதம் அடிப்பார் என்று எதிர்பார்க்கப்பட்ட பிரித்திவி ஷா(42 ரன்கள்,23 பந்துகள்) சிராஜ் பந்தில் டி வில்லியர்ஸிடம் கேட்ச் கொடுத்து அவுட் ஆனார்.

அடுத்து கேப்டன் ஷ்ரேயாஸ் ஐயர் தவான் உடன் இணைய,அடித்து ஆடிய தவான்(32 ரன்கள்,28 பந்துகள்) உடானா பந்தில் மொயின் அலியிடம் கேட்ச் கொடுத்து நடையைக்கட்ட டெல்லி அணி 10 ஓவர் முடிவில் 2 விக்கெட் இழப்பிற்கு 85 ரன்கள் எடுத்து இருந்தது.மொயின் அலி வீசிய 12 வது ஓவரில் டெல்லி கேப்டன் ஷ்ரேயாஸ் ஐயர் 11 ரன்களுடன் பட்டிகலிடம் கேட்ச் கொடுத்து அவுட் ஆனார்.பண்ட் மற்றும் ஸ்டொய்னிஸ் களத்தில் இருக்க,12.4 ஓவர்களில் டெல்லி அணி 100 ரன்களை கடந்தது.ஸ்டொய்னிஸ் மொயின் வீசிய 14 வது ஓவரில் ஒரு பௌண்டரி,ஒரு சிக்ஸர் அடித்து அசத்த,டெல்லி அணி ஸ்கோர் மின்னல் வேகத்தில் ஏறியது.

17 ஓவர் முடிவில் டெல்லி அணி 161 ரன்கள் எடுத்து இருக்க,பண்ட்(37 ரன்கள்,25 பந்துகள்) ஒரு முனையில் சிராஜ் வீசிய 18.2 வது பந்தில் கிளீன் போல்ட் ஆனார்.மறுமுனையில் ஸ்டொய்னிஸ் 24 பந்துகளில் 50 ரன்களை கடந்தார்.20 ஓவர் முடிவில் டெல்லி அணி 4 விக்கெட் இழப்பிற்கு 196 ரன்கள் அடித்து பெங்களூர் அணிக்கு 197 ரன்கள் இலக்காக வழங்கியது.