11,12ம் வகுப்புகளுக்கு மறுகூட்டலுக்கு விண்ணப்பிப்பது எப்போது?பள்ளிக்கல்வித்துறை அறிவிப்பு

11 மற்றும் 12ம் வகுப்புகளுக்கு மறுகூட்டலுக்கு விண்ணப்பிக்கும் தேதிகளை பள்ளிக்கல்வித்துறை அறிவித்துள்ளது.

சென்னை:

11 மற்றும் 12ம் வகுப்புகளுக்கு மறுகூட்டலுக்கு விண்ணப்பிக்கும் தேதிகளை பள்ளிக்கல்வித்துறை அறிவித்துள்ளது.இதுதொடர்பாக, அரசுத் தேர்வுகள் இயக்குநர் உஷாராணி வெளியிட்டுள்ள செய்திக் குறிப்பில் கூறியிருப்பதாவது:-

விடைத்தாள் நகல்:

செப்டம்பர் / அக்டோபர் 2020, மேல்நிலை முதலாமாண்டு / இரண்டாமாண்டு பொதுத் தேர்வெழுதி விடைத்தாட்களின் நகல் கோரி விண்ணப்பித்த தேர்வர்கள் வரும் 18-ந் தேதி (புதன்கிழமை) முற்பகல் காலை 11 மணி முதல் http://www.dge.tn.gov.in/ என்ற இணையதளத்திற்குச் சென்று Notification பக்கத்தில் தங்களது பதிவெண் மற்றும் பிறந்த தேதியினைப் பதிவு செய்து தாங்கள் விண்ணப்பித்த பாடங்களுக்குரிய விடைத்தாட்களின் நகலினைப் பதிவிறக்கம் செய்துக் கொள்ளலாம்.விடைத்தாள்களின் நகலினை பதிவிறக்கம் செய்த பிறகு மறுகூட்டல் –II அல்லது மறுமதிப்பீட்டிற்கு விண்ணப்பிக்க விரும்பினால், இதே இணையதள முகவரியில் விண்ணப்பத்தினைப் பதிவிறக்கம் செய்து கொள்ளவேண்டும்.

மறுகூட்டல்:

இவ்விண்ணப்பப் படிவத்தினை, பூர்த்தி செய்து இரு நகல்கள் எடுத்து 19-ந் தேதி காலை 10.00 மணி முதல் 20-ந் தேதி மாலை 5.00 மணிக்குள் உரிய முதன்மைக் கல்வி அலுவலர் அலுவலகத்தில் ஒப்படைக்க வேண்டும். மறுகூட்டல் மற்றும் மறுமதிப்பீட்டிற்கான கட்டணத்தினை முதன்மைக் கல்வி அலுவலர் அலுவலகத்தில் பணமாகச் செலுத்த வேண்டும். மறுமதிப்பீடு பாடம் (ஒவ்வொன்றிற்கும்) – ரூ. 505. மறுகூட்டல் உயிரியல் பாடம் மட்டும் – ரூ.305. ஏனையப் பாடங்கள் (ஒவ்வொன்றிற்கும்) – ரூ.205.
இவ்வாறு அதில் தெரிவிக்கப்பட்டுள்ளது.