ஹாலிவுட் படத்தின் துவம்சம் செய்யும் தனுஷ்- வெளியானது தி கிரே மேன் டிரெய்லர்..!!
ரேயான் காஸ்லிங், கிறிஸ் ஈவென்ஸ், தனுஷ் நடிப்பில் ரூஸோ சகோதரர்கள் இயக்கத்தில் உருவாகியுள்ள தி கிரே மேன் படத்தின் டிரெய்லர் சமூகவலைதளங்களில் வெளியாகி டிரெண்டாகி வருகிறது.
அவெஞ்சர்ஸ் வரிசைப் படங்களை இயக்கியதன் மூலம் உலக அரங்கில் மிகப்பெரிய அதிர்வலைகளை ஏற்படுத்திய இரட்டை இயக்குநர்கள் தான் ஆண்டனி ரூஸோ மற்றும் ஜோ ரூஸோ. இவர்களை செல்லமாக ரூஸோ பிரதர்ஸ் என்று ஹாலிவுட் உலகம் குறிப்பிடுகிறது.
பிரபல ஓ.டி.டி நிறுவனமான நெட்ஃப்ளிக்ஸ் தயாரித்துள்ள ‘தி கிரே மேன்’ படத்தை தற்போது இவர்கள் இயக்கியுள்ளனர். இந்த படத்தில் ரையான் காஸ்லிங், கிறிஸ் இவான்ஸ், அனா டி அர்மாஸ், ஜெசிக்கா ஹென்விக் உள்ளிட்ட ஹாலிவுட் சினிமாவின் முன்னணி கலைஞர்கள் இணைந்து நடித்துள்ளனர்.
இந்த படத்தில் நடிகர் தனுஷும் முக்கியமான கதாபாத்திரத்தில் நடித்துள்ளார். ரூ. 1500 கோடி மதிப்பில் உருவாகியுள்ள இந்த படம் வரும் ஜூலை 22-ம் தேதி நெட்ஃப்ளிக்ஸ் தளத்தில் வெளியாகிறது. முன்னதாக இன்று படத்தின் முன்னோட்டம் வெளியிடப்பட்டுள்ளது.
அதிரடியான த்ரில்லிங் கதைகளத்தில் தி கிரே மேன் படம் தயாராகியுள்ளது. தனுஷின் கதாபாத்திரத்திற்கு வழங்கப்பட்டுள்ள வலு, டிரெய்லரை காணும் போதே தெரிகிறது. இதையடுத்து தி கிரே மேன் படம் மீதான எதிர்பார்ப்பு ரசிகர்களிடையே அதிகரித்துள்ளது.
