தமிழ்நாடு ஆளுநராக ராஜேந்திர அர்லேகர் நியமனம்!

புதுடெல்லி: தமிழ்நாட்டின் ஆளுநர் பொறுப்பைக் கூடுதலாகக் கவனித்து வந்த கேரள ஆளுநர் ராஜேந்திர விஸ்வநாத் அர்லேகரை, தமிழ்நாடு ஆளுநராக நியமித்து குடியரசுத் தலைவர் திரவுபதி முர்மு உத்தரவிட்டுள்ளார். இதற்கான அறிவிப்பைக் குடியரசுத் தலைவர் மாளிகை இன்று (அக்டோபர் 12) வெளியிட்டுள்ளது. கேரள ஆளுநராக சிக்கிம் ஆளுநர் ஓம் பிரகாஷ் மாத்தூர் நியமிக்கப்பட்டுள்ளார்.

மார்ச் மாதம் கூடுதல் பொறுப்பு

தமிழ்நாடு ஆளுநராக இருந்த ஆர்.என்.ரவி மேற்கு வங்க ஆளுநராக மாற்றப்பட்டதைத் தொடர்ந்து, கடந்த மார்ச் 5ஆம் தேதி தமிழ்நாடு ஆளுநரின் பணிகளைக் கூடுதலாகக் கவனிக்கும் பொறுப்பு அர்லேகருக்கு வழங்கப்பட்டது.

மார்ச் 12ஆம் தேதி சென்னை ஆளுநர் மாளிகையில் நடைபெற்ற நிகழ்ச்சியில் அவர் பொறுப்பேற்றார். சென்னை உயர் நீதிமன்றத் தலைமை நீதிபதி சுஷ்ருத் அரவிந்த் தர்மாதிகாரி அவருக்குப் பதவிப்பிரமாணம் செய்து வைத்தார். அப்போதைய முதலமைச்சர் மு.க.ஸ்டாலின் உள்ளிட்டோர் நிகழ்ச்சியில் பங்கேற்றனர்.

விஜய்க்குப் பதவிப்பிரமாணம் செய்து வைத்தவர்

சட்டப்பேரவைத் தேர்தலைத் தொடர்ந்து, கடந்த மே 10ஆம் தேதி சென்னை நேரு உள்விளையாட்டு அரங்கில் நடைபெற்ற விழாவில், தமிழக முதலமைச்சராக விஜய்க்குப் பதவிப்பிரமாணம் செய்து வைத்தவர் அர்லேகர். தமிழ்நாட்டின் கூடுதல் பொறுப்பு ஆளுநராகச் செயல்பட்ட காலத்தில் இந்தப் பதவியேற்பு நடைபெற்றது.

மூன்று மாநிலங்களில் ஆளுநர் அனுபவம்

கோவாவைச் சேர்ந்த அர்லேகர், 2021 ஜூலையில் இமாச்சலப் பிரதேச ஆளுநராக நியமிக்கப்பட்டார். பின்னர் 2023 பிப்ரவரியில் பிஹார் ஆளுநராகப் பொறுப்பேற்றார். அங்கிருந்து கேரளத்துக்கு மாற்றப்பட்ட அவர், 2025 ஜனவரி 2ஆம் தேதி கேரள ஆளுநராகப் பதவியேற்றார்.

அதற்கு முன்பு கோவா சட்டப்பேரவை உறுப்பினர், பேரவைத் தலைவர் மற்றும் மாநில அமைச்சராகவும் பணியாற்றியுள்ளார்.

பொறுப்பேற்கும் நாளில் நடைமுறை

கேரள ஆளுநர் பதவியுடன் தமிழ்நாட்டின் கூடுதல் பொறுப்பையும் கவனித்து வந்த அர்லேகர், தற்போது தமிழ்நாட்டுக்கென ஆளுநராக நியமிக்கப்பட்டுள்ளார். இந்த நியமனம் அவர் பொறுப்பேற்கும் நாளிலிருந்து நடைமுறைக்கு வரும் என்று குடியரசுத் தலைவர் மாளிகை தெரிவித்துள்ளது.