சினிமா ரசிகர்களுக்கு நல்ல சேதி.. திரையரங்குகள் குறித்து அமைச்சர் கடம்பூர் ராஜு தகவல்

தமிழகத்தில் திரையரங்குகள் திறக்கப்படுவது எப்போது?, என்பது குறித்து
அமைச்சர் கடம்பூர் ராஜூ பதிலளித்துள்ளார்.

கொரோனா பரவல் அச்சுறுத்தல் காரணமாக விதிக்கப்பட்ட ஊரடங்கில் பல்வேறு தளர்வுகளும் அறிவிக்கப்பட்டுள்ள நிலையில், திரையரங்குள் திறப்பதற்கு மட்டும் இன்னும் தடை தொடர்கிறது. இதனால், திரையரங்குகளை விரைந்து திறக்க வேண்டும் என்று திரைப்படத் துறையினர் தொடர்ந்து வலியுறுத்தி வருகின்றனர்.

திரையரங்குகள் திறக்க கால தாமதமாவதால், பல படங்கள் நேரடியாக ஆன்லைன் தளத்தில் வெளியாகி வருவது திரையரங்க உரிமையாளர்களிடையே அச்சத்தை ஏற்படுத்தி உள்ளது.
இந்நிலையில், தமிழக செய்தி மற்றும் விளம்பரத்துறை அமைச்சர் கடம்பூர் ராஜூவை திரையரங்க உரிமையாளர்கள் இன்று நேரில் சந்தித்தனர்.

அதைதொடர்ந்து செய்தியாளர்களை சந்தித்த அமைச்சர் கடம்பூர் ராஜூ கூறியதாவது:-
திரையரங்குகள் திறக்கப்படுவது குறித்து மத்திய அரசிடம் இருந்து முழுமையான வழிகாட்டு நெறிமுறைகள் வரவில்லை. மத்திய அரசின் வழிகாட்டுதல், மருத்துவ வல்லுநர் குழுவின் அறிவுறுத்தல்படி நடவடிக்கை எடுக்கப்படும். தமிழகத்தில் திரையரங்குகளை திறப்பது குறித்து விரைவில் அறிவிப்பு வெளியாகும்.
என்று அமைச்சர் கூறினார்.