திரையிட்ட இடங்களெல்லாம் திருவிழாக் கோலம்… ருத்ர தாண்டவம் திரைப்படத்தின் முதல் நாள் முதல் காட்சி….

தனது திரௌபதி திரைப்படத்திற்கு பிறகு ‘ருத்ர தாண்டவம்’ படத்தின் மூலம் மீண்டுமொரு பரபரப்பு தீயை தமிழகத்தில் பற்றவைத்திருக்கிறார் திரைப்பட இயக்குநர் மோகன் ஜி. இத்திரைப்படம் இவருக்கு இரண்டாவது திரைப்படம் தான் என்றாலும் படத்திற்கு பெரிய பெரிய அரசியல் தலைவர்கள் கொடுத்த சர்டிஃபிகேட் படத்தின் மீதான எதிர்பார்ப்பை எகிற வைத்துள்ளது.

இந்தத் திரைப்படம் சமீபத்தில் அரசியல் கட்சித் தலைவர்களுக்கு ஸ்பெஷல் ஷோ திரையிடப்பட்டு காட்டப்பட்டது. படத்தைப் பார்த்துவிட்டு செய்தியாளர்களிடம் பேசிய பா.ஜ.க தலைவர் ஹெச்.ராஜா, ‘இந்து மதம் இல்லையென்றால், தமிழ் எங்கே இருந்து வந்தது? இந்தப் படம் எந்த சாதி, மதத்துக்கு எதிராகவும் எடுக்கப்பட்டதல்ல’ என்றார். அதே போல இயக்குனர் தங்கர் பச்சன் ருத்ர தாண்டவம் படத்தினை பாராட்டி அறிக்கை ஒன்றினையே வெளியிட்டார்.

இந்நிலையில் இன்று காலை இத்திரைப்படம் திரையரங்குகளில் வெளியாகியுள்ளது. ரிச்சர்ட் ரிஷி, தர்ஷா குப்தா, கௌதம் வாசுதேவ் மேனன், புகழ் என நட்சத்திரப்பட்டாளமே இத்திரைப்படத்தில் நடித்துள்ளனர். இன்று காலை முதலே திரையரங்குகள் தமிழகத்தின் உச்ச நட்சத்திரங்களின் திரைப்படம் ரிலீஸ் ஆனது போல வெடி வைத்து மேள தாளங்கள் முழங்க சிறப்பான வரவேற்பு அளித்து வருகின்றனர்.

டிக்கெட் கவுண்டரில் நீண்ட வரிசையில் நின்று ரசிகர்கள் டிக்கெட் வாங்கி மகிழ்வதையும் காண முடிகிறது. குறிப்பாக தர்மபுரி, திண்டுக்கல் மாவட்டங்களிலும் திரையரங்குகள் திருவிழாக் கோலம் பூண்டுள்ளது.

முதல் நாள் என்பதால் இவ்வளவு கூட்டமா அல்லது திரௌபதி போல இதுவும் அடுத்த மிகப்பெரிய ஹிட்டா என்பது இன்னும் இரண்டு நாட்களில் தெரிய வரும்.