முன்னாள் பிரதமர் மன்மோகன் சிங் உடல்நிலை குறித்து மருத்துவர்களின் முக்கிய அறிக்கை!!

முன்னாள் பிரதமர் மன்மோகன் சிங் உடல்நிலை சீராக உள்ளது என டெல்லி எய்ம்ஸ் மருத்துவமனை அதிகாரிகள் தெரிவித்து உள்ளனர்.

டெல்லி,
முன்னாள் பிரதமரும், காங்கிரஸ் கட்சியின் மூத்த தலைவர்களுள் ஒருவருமான 89 வயதான மன்மோகன் சிங் உடல்நலக் குறைவு காரணமாக கடந்த புதன்கிழமை இரவு டெல்லி எய்ம்ஸ் மருத்துவமனையில் அனுமதிக்கப்பட்ட்டார். லேசான காய்ச்சல் மற்றும் நெஞ்செரிச்சல் காரணமாக அனுமதிக்கப்பட்டு இருக்கிறார் என மருத்துவமனை நிர்வாகம் தரப்பில் தெரிவிக்கப்பட்டது. முன்னதாக, மன்மோகன் சிங் கடந்த ஆண்டு ஏப்ரல் மாதம் கொரோனா நோய்த்தொற்று பாதிக்கப்பட்டு டெல்லி எய்ம்ஸ் மருத்துவமனையில் சிகிச்சை பெற்று வீடு திரும்பினார்.

2009-ல் ஏற்கனவே, அவருக்கு இதய அறுவை சிகிச்சை மேற்கொள்ளப்பட்டிருந்து. சமீபத்தில் டெல்லியில் உள்ள ராணுவ மருத்துவமனையில் இருதய சிகிச்சை மேற்கொண்டார்.தற்போது மீண்டும் உடல்நலக் குறைவு காரணமாக டெல்லி எய்ம்ஸ் மருத்துவமனையின் இதயவியல் துறையில் அனுமதிக்கப்பட்டிருக்கிறார். மருத்துவ குழு அவரை கண்காணித்து வருவதாகவும், தொடர்ச்சியாக அவரது உடல்நிலையில் முன்னேற்றம் இருப்பதாக எய்ம்ஸ் மருத்துவமனை தரப்பில் தெரிவிக்கப்பட்டது. மத்திய சுகாதாரத்துறை அமைச்சரும் நேரில் மருத்துவர்களை சந்தித்து சிகிச்சை குறித்து கேட்டறிந்தார்.

இந்நிலையில், இன்று எய்ம்ஸ் மருத்துவமனை நிர்வாகம் தரப்பில் மன்மோகன் சிங் உடல்நிலை சீராக இருப்பதாக தெரிவிக்கபட்டுள்ளது. தொடர்மருத்துவ கண்காணிப்பில் இருப்பதாகவும், உடல்நிலையில் நல்ல முன்னேற்றம் ஏற்பட்டு இருப்பதாக மருத்துவமனை அதிகாரிகள் தரப்பில் தெரிவிக்கப்பட்டுள்ளது.