By தெலுங்கு சீரியல்களில் நடித்துக் கொண்டிருந்த பாவனி ரெட்டியை ‘ரெட்டை வால் குருவி’ சீரியலுக்காக தமிழ் சின்னத்திரை உலகிற்கு கூட்டி வந்தது விஜய் டிவி. அந்த சீரியலுக்குப் பிறகு சன் டிவிக்கு வந்தார். தமிழ் சினிமாவின் முன்னணி ஹீரோ ஒருவரின் குடும்பத் தயாரிப்பான ‘பாசமலர்’ சீரியலில் நடித்து ஹிட் கொடுத்தார். அந்த சீரியலில் பாவனியுடன் இணைந்து நடித்தவர்தான் பிரதீப்.
சீரியல் ஷூட்டிங் ஸ்பாட்டிலேயே இருவரும் காதல் வளர்த்து வந்தனர். இரண்டாண்டு கால காதலுக்குப் பிறகு 2017-ம் ஆண்டு காதலர் தினத்தன்று பாவனி – பிரதீப் இருவரும் திருமணம் செய்து கொண்டனர்.
ஆனால் என்ன பிரச்னையோ அந்த இருவரது வாழ்க்கையும் ஓராண்டுக்குள் முடிவடைந்தது. பிரதீப் திடீரென தற்கொலை செய்துகொள்ள, பாவனி போலீஸ் ஸ்டேஷன்வரை அலைய வேண்டிவந்தது. பிரதீப்பின் தற்கொலைக்கு பாவனி தான் காரணம் என பிரதீப்பின் குடும்பத்தினர்தான் பாவனி மீது காவல்துறையில் புகார் அளித்தனர்.
அடுத்த ஆறு மாத காலம் மன அமைதிக்காக நடிப்பிலிருந்து ஒதுங்கியிருந்தவரை மீண்டும் ‘சின்னத்தம்பி’க்காக விஜய் டிவி அழைத்தது. கடந்த காலத்தை மறந்து மறுபடியும் நடிப்பில் கவனம் செலுத்தத் தொடங்கினார். சீரியல்களுடன் தமிழ், தெலுங்கு, ஏன் சில இந்திப்படங்களிலும் கூட நடித்து முடித்தார். ஆனந்த் ஜாய் என்பவரை இரண்டாவது திருமணமும் செய்து கொண்டார்.
ஆனால் பிக் பாஸ் வீட்டிற்குள் சென்றதும் அந்தத் திருமணம் நடக்கவில்லை எனத் தெரிவித்து வருகிறார். ஆனந்த ஜாயுமே தங்களுக்குள் திருமணம் நடக்கவில்லை என்றே சோஷியல் மீடியாவில் தெரிவித்துள்ளார்.
பாவனி – ஆனந்த் இருவருக்கும் நெருக்கமான நட்பு வட்டத்தினர் தெரிவிக்கும் போது, “இவர்கள் பழகியது உண்மை. ரெண்டு பேரும் சேர்ந்து போரூர் பக்கம் சொந்தமா ஃபிளாட் வாங்கி கிரஹப்பிரவேசம் செய்து அங்கதான் இருந்தாங்க. முறைப்படி திருமணம் செய்துகிட்டாங்களா, செய்திருந்தா அதை ஏன் மறைக்கிறாங்கனு எங்களுக்குத் தெரியலை” என்று குழப்பமாக சொல்கிறார்கள்.
தொடர்ந்து பேசும் போது, “ஆனந்த ஜாய், நடிகர் சிலம்பரசனுக்கு ரொம்பவே நெருக்கம். அவர் சிம்புகிட்டப் பேசி, சிம்பு சிபாரிசுலதான் பாவனி பிக் பாஸ் நிகழ்ச்சிக்குள் போனதாகவும் ஒரு தகவல் இருக்கு.” எனத் தெரிவித்துள்ளனர்.
