17 வயதில் உலகை தனியாக சுற்றிவந்து சாதனை படைத்த சிறுவன்

17வயது சிறுவன் உலகை தனியாக சுற்றி வந்து சாதனை படைத்துள்ளார்.

பெல்ஜியம் நாட்டை சேர்ந்த இங்கிலாந்து வம்சாவளியான மேக் ரதர்போர்ட் என்ற 17 வயது சிறுவன் விமானத்தில் தனியாக பறந்து உலகை சுற்றி வந்துள்ளார். இதன்மூலம் உலகை வலம் வந்த இளம் விமானி என்ற சாதனையை படைத்துள்ளார்.

இந்த சாதனை பயணம் பல்கேரியா தலைநகர் சோபியாவில் இருந்து கடந்த மார்ச் மாதம் 23ம் தேதி தொடங்கியது. மணிக்கு 300 கி.மீ வேகத்தில் செல்லும் உலகின் அதிவேக அல்ட்ராலைட் விமானங்களில் ஒன்றான ஷார்க் என்ற விமானத்தில் பயணம் செய்த மேக் ரதர்போர்ட் 3 மாதத்தில் தன்னுடைய லட்சிய பயணத்தை நிறைவு செய்ய திட்டமிட்டிருந்தார். ஆனால், பருவமழை, மணல் புயல், கடுமையான வெப்பம் போன்ற காரணங்களால் 5 மாதங்கள் ஆனது. அதன்படி, கடந்த 5 மாதங்களில் 5 கண்டங்களில் உள்ள 52 நாடுகளை சுற்றி வந்த அவர் நேற்று பல்கேரியா தலைநகர் சோபியாவில் விமானத்தை தரையிறக்கி சாதனை பயணத்தை நிறைவு செய்தார். இதையடுத்து விமான நிலையத்தில் குவிந்திருந்த அவரது உறவினர்கள் மற்றும் நண்பர்கள் கரவொலிகளை எழுப்பி உற்சாக வரவேற்பு அளித்தனர்.

கடந்த 2020ம் ஆண்டு தனது 15 வயதில் விமானிக்கான உரிமத்தை பெற்று உலகின் இளம் வயது விமானி என்கிற பெருமையை அடைந்த மேக் ரதர்போர்ட் தற்போது 5 மாதங்களில் தனியாக உலகை சுற்றி வந்து சாதனை படைத்துள்ளார். இதற்கு முன்பு 19வயதில் ஜாரா ரதர்போர்ட் என்பவர், விமானத்தில் தனியாக உலகை சுற்றி வந்து சாதனை படைத்துள்ளார். இவர் வேறு யாரும் அல்ல. மேக் ரதர்போர்டின் அக்கா ஆவார். தற்போது தம்பி, அக்காவின் சாதனையை முறையடித்துள்ளார்.