பாகிஸ்தான் வீரர்கள் சிறப்பாக விளையாடினார்கள்: ரோகித் சர்மா

பாகிஸ்தான் வீரர்கள் எங்களை விட சிறப்பாக விளையாடினார்கள் என்று இந்திய கேப்டன் ரோகித் சர்மா தெரிவித்துள்ளார்.

ஆசிய கோப்பை டி20 தொடரில் நேற்று நடந்த சூப்பர் 4 சுற்று போட்டியில் பாகிஸ்தான் அணி 5 விக்கெட் வித்தியாசத்தில் வெற்றி பெற்றது.முதலில் பேட்டிங் செய்த இந்திய அணி 20 ஓவர்கள் முடிவில் 7 விக்கெட் இழப்பிற்கு 181 ரன்கள் எடுத்தது. 182 ரன்கள் எடுத்தால் வெற்றி என்ற இலக்குடன் களம் இறங்கிய பாகிஸ்தான் அணி, ரிஸ்வானின் அதிரடி ஆட்டத்தால் 19.5 ஓவர்கள் முடிவில் 5 விக்கெட் இழப்பிற்கு 182 ரன்கள் எடுத்து 5 விக்கெட்கள் வித்தியாசத்தில் வெற்றி பெற்றது.

போட்டிக்குப்பின் பேசிய ரோகித் சர்மா கூறியதாவது: இந்த போட்டி எங்களுக்கு சிறந்த பாடத்தை அளித்துள்ளது. 181 ரன்கள் நல்ல ஸ்கோர் என நினைத்தேன். எந்த மைதானத்திலும், எத்தகைய சூழ்நிலையிலும் நல்ல ஸ்கோர் என்ற மனநிலையில் இருந்து மாறவேண்டும் என்ற பாடத்தினை இந்த போட்டி தந்திருக்கிறது. இது மிகவும் அழுத்தம் நிறைந்த போட்டி என்பது எங்களுக்குத் தெரியும். பாகிஸ்தான் வீரர்களுக்கு பாராட்டு தெரிவிக்க வேண்டும். அவர்கள் எங்களை விட சிறப்பாக விளையாடினார்கள். இவ்வாறு அவர் தெரிவித்தார். இந்த போட்டியில் கேப்டன் ரோகித் சர்மா 28 ரன்கள் எடுத்ததன் மூலம் டி20 போட்டிகளில் அதிக ரன்கள் எடுத்தவர் என்ற சாதனையை படைத்தார்.