வேகமெடுத்த இந்தியத் தொழிற்சாலைகள்!

வேகமெடுத்த இந்தியத் தொழிற்சாலைகள்!

பெங்களூரு: உள்நாடு மற்றும் வெளிநாடுகளில் புதிய ஆர்டர்கள் அதிகரித்ததால், இந்தியாவின் உற்பத்தித்துறை செப்டம்பர் மாதத்தில் ஏழு மாதங்களில் இல்லாத வேகமான வளர்ச்சியைப் பதிவு செய்துள்ளது. கடந்த மூன்று மாதங்களாகக் காணப்பட்ட வளர்ச்சிக் குறைவும் இதன்மூலம் முடிவுக்கு வந்துள்ளது.

S&P Global நிறுவனம் தயாரித்த HSBC இந்திய உற்பத்தித்துறை கொள்முதல் மேலாளர் குறியீடு எனப்படும் PMI, ஆகஸ்டில் பதிவான 52.8 புள்ளிகளிலிருந்து செப்டம்பரில் 55.1 புள்ளிகளாக உயர்ந்துள்ளது. இது கடந்த பிப்ரவரி மாதத்துக்குப் பிறகு பதிவான அதிகபட்ச அளவாகும். PMI மதிப்பு 50 புள்ளிகளுக்கு மேல் இருந்தால் உற்பத்தித்துறை விரிவடைந்து வருவதாகப் பொருள்.

புதிய ஆர்டர்கள் அதிகரிப்பு

மின்னணுப் பொருட்கள், உணவுப் பொருட்கள், மருந்துகள் மற்றும் ஜவுளிப் பொருட்களுக்கான தேவை அதிகரித்ததால், புதிய ஆர்டர்கள் பிப்ரவரிக்குப் பிறகு இல்லாத வேகத்தில் உயர்ந்துள்ளன. பிரேசில், ஐரோப்பா, ஐக்கிய அரபு அமீரகம் மற்றும் அமெரிக்காவிலிருந்து கிடைத்த ஆர்டர்களால் ஏற்றுமதியும் அதிகரித்துள்ளது.

புதிய வணிக ஆர்டர்கள் மற்றும் சந்தைத் தேவை காரணமாக உற்பத்தி வளர்ச்சி மே மாதத்துக்குப் பிறகு இல்லாத அளவுக்கு வேகமெடுத்துள்ளது. வரவிருக்கும் விற்பனையை எதிர்பார்த்து நிறுவனங்கள் அதிக மூலப்பொருட்களை வாங்கி, கையிருப்பையும் உயர்த்தியுள்ளன.

மீண்டும் அதிகரித்த வேலைவாய்ப்பு

உற்பத்தித்துறையில் ஆகஸ்ட் மாதம் வேலைவாய்ப்பு குறைந்திருந்த நிலையில், செப்டம்பரில் நிறுவனங்கள் மீண்டும் பணியாளர்களை நியமிக்கத் தொடங்கியுள்ளன. வேலைவாய்ப்பு உருவாக்கம் மே மாதத்துக்குப் பிறகு இல்லாத வேகத்தில் அதிகரித்துள்ளது.

புதிய விசாரணைகள் மற்றும் தேவை தொடர்ந்து நிலைக்கும் என்ற எதிர்பார்ப்பால் தொழில் நிறுவனங்களின் நம்பிக்கையும் நான்கு மாதங்களில் இல்லாத உயரத்தை எட்டியுள்ளதாக ஆய்வில் தெரிவிக்கப்பட்டுள்ளது.

விலைவாசி அழுத்தமும் அதிகரிப்பு

உற்பத்தி வளர்ச்சி வேகமெடுத்துள்ள அதேவேளையில், மின்னணு உதிரிபாகங்கள், மருந்து மூலப்பொருட்கள் மற்றும் எஃகு விலை உயர்வால் நிறுவனங்களின் உற்பத்திச் செலவும் அதிகரித்துள்ளது. இருப்பினும், செலவு அதிகரிக்கும் வேகம் நீண்டகால சராசரியைவிடக் குறைவாகவே இருப்பதாக ஆய்வு கூறுகிறது.

செப்டம்பரில் பதிவான இந்த வளர்ச்சி, இந்திய உற்பத்தித்துறை மீண்டும் வேகம் பெறுவதைக் காட்டுகிறது. ஆனால் கச்சா எண்ணெய் விலை, மூலப்பொருள் செலவு மற்றும் பணவீக்க அழுத்தம் வரும் மாதங்களின் வளர்ச்சியைத் தீர்மானிக்கும் முக்கிய காரணிகளாக இருக்கும்.

Related Articles

Leave a Reply

Your email address will not be published. Required fields are marked *