செம்மொழிகளுக்கு புதிய பலம்; 5 ஆய்வு மையங்களுக்கு ஒப்புதல்!

புதுடெல்லி: இந்தியாவின் மொழி மற்றும் இலக்கிய மரபுகளைப் பாதுகாக்கும் வகையில், ஐந்து செம்மொழிகளுக்கான சிறப்பு ஆய்வு மையங்களை அமைக்க மத்திய கல்வி அமைச்சகம் ஒப்புதல் வழங்கியுள்ளது.

அசாமி, வங்காளம், மராத்தி, பாலி மற்றும் பிராகிருதம் ஆகிய செம்மொழிகளின் மேம்பட்ட ஆய்வு, ஆவணப்படுத்துதல் மற்றும் பாதுகாப்புப் பணிகளை இந்த மையங்கள் மேற்கொள்ளவுள்ளன.

எங்கு அமைகின்றன?

செம்மொழி அசாமிக்கான ஆய்வு மையம் அசாமில் உள்ள தேஜ்பூர் பல்கலைக்கழகத்திலும், செம்மொழி வங்காளத்துக்கான மையம் மேற்கு வங்கத்தில் உள்ள விஸ்வபாரதி பல்கலைக்கழகத்திலும் அமைகிறது.

செம்மொழி மராத்திக்கான மையம் புனேயிலுள்ள டெக்கான் கல்லூரி முதுநிலை மற்றும் ஆராய்ச்சி நிறுவனத்திலும், செம்மொழி பாலிக்கான மையம் ஒடிசா மத்தியப் பல்கலைக்கழகத்திலும் அமைக்கப்படவுள்ளது. செம்மொழி பிராகிருதத்துக்கான ஆய்வு மையம் குஜராத் மத்தியப் பல்கலைக்கழகத்தில் செயல்படும்.

பழமையான நூல்கள் டிஜிட்டல் மயம்

இந்த ஐந்து சிறப்பு ஆய்வு மையங்களும் சம்பந்தப்பட்ட மொழிகளில் மேம்பட்ட கல்வி ஆராய்ச்சிகள் மற்றும் அறிஞர்களின் ஆய்வுப் பணிகளை ஊக்குவிக்கும். மொழி மற்றும் இலக்கியம் சார்ந்த பழமையான ஆவணங்கள், நூல்கள் உள்ளிட்ட வளங்களைப் பாதுகாத்து டிஜிட்டல் வடிவில் மாற்றும் பணிகளும் மேற்கொள்ளப்படும்.

செம்மொழிகளுடன் தொடர்புடைய இலக்கியம், மொழியியல் அறிவு மற்றும் பாரம்பரியத் தகவல்கள் அதிகமானோருக்குச் சென்றடையும் வகையில் அவற்றைப் பரப்புவதும் இந்த மையங்களின் முக்கிய நோக்கமாகும்.

அசாம், மேற்கு வங்கம், மகாராஷ்டிரா, ஒடிசா மற்றும் குஜராத் ஆகிய ஐந்து மாநிலங்களில் அமையும் இந்த மையங்கள், செம்மொழி ஆராய்ச்சிக்கான உயர்கல்விக் கட்டமைப்பை வலுப்படுத்தும் என்று மத்திய கல்வி அமைச்சகம் தெரிவித்துள்ளது.