ரயிலில் சத்தமாகப் பாடல் கேட்டு தொல்லை அளித்தால் ரூ.1,000 அபராதம்!

சென்னை: ரயில்களிலும் ரயில் நிலையங்களிலும் செல்போன் ஸ்பீக்கரில் அதிக சத்தத்துடன் பாடல்கள் கேட்பது, வீடியோக்களைப் பார்ப்பது மற்றும் சத்தமாகப் பேசுவதன் மூலம் சக பயணிகளுக்குத் தொல்லை அளிப்பவர்கள் மீது நடவடிக்கை எடுக்கத் தெற்கு ரயில்வே அறிவுறுத்தியுள்ளது.

பயணிகள் பாடல்கள் கேட்கவும் வீடியோக்களைப் பார்க்கவும் இயர்போன் பயன்படுத்த வேண்டும் என்றும், தொலைபேசி உரையாடல்களை மற்றவர்களுக்கு இடையூறு ஏற்படுத்தாத குறைந்த ஒலியில் மேற்கொள்ள வேண்டும் என்றும் அறிவுறுத்தப்பட்டுள்ளது.

என்ன தண்டனை?

திருத்தப்பட்ட ரயில்வே சட்டத்தின் 145(2) பிரிவின்படி, சக பயணிகளுக்குத் தொல்லை ஏற்படுத்தும் செயல்களுக்கு ரூ.1,000 அபராதம் விதிக்கவும், பயணச்சீட்டு அல்லது பாஸை இழக்கச் செய்து ரயில்வே வளாகத்திலிருந்து வெளியேற்றவும் வழிவகை உள்ளது.

அதிகாரமுள்ள ரயில்வே பணியாளர் நிறுத்தும்படி அறிவுறுத்திய பிறகும் தொல்லையைத் தொடர்ந்தால், ஆறு மாதங்கள் வரை சாதாரண சிறைத்தண்டனை அல்லது ரூ.5,000 வரை அபராதம் அல்லது இரண்டும் விதிக்கப்படலாம்.

எனவே, ஹெட்போன் பயன்படுத்தாமல் இருப்பது மட்டுமே தண்டனைக்கான காரணம் அல்ல. மற்றவர்களுக்குத் தொல்லை ஏற்படுத்துவதும், நிறுத்தச் சொன்ன பிறகும் அதைத் தொடர்வதுமே நடவடிக்கைக்கான அடிப்படை.

ரயில்களிலும் நிலையங்களிலும் விழிப்புணர்வு

பிராந்திய மொழிகள், இந்தி மற்றும் ஆங்கிலத்தில் பயணிகளுக்கு விழிப்புணர்வு அறிவிப்புகளை வழங்கத் தெற்கு ரயில்வே வணிகப் பிரிவு அறிவுறுத்தியுள்ளது. மேற்கொள்ளப்பட்ட விழிப்புணர்வு நடவடிக்கைகள் குறித்த அறிக்கைகளை அக்டோபர் 20க்குள் சமர்ப்பிக்கக் கோட்ட அலுவலகங்களுக்கு உத்தரவிடப்பட்டுள்ளது.