சிவகார்த்திகேயனின் ‘டாக்டர்’முதல் நாள் வசூல் நிலவரம்… நம்ம வீட்டு பிள்ளைக்கு கோலிவுட்டில் கிடைத்த அங்கீகாரம்!!

லேடி சூப்பர் ஸ்டார் நயன்தாராவின்’ கோலமாவு கோகிலா’ திரைப்படத்தை இயக்கி புகழ்பெற்ற நெல்சன் திலீப்குமார் இயக்கத்தில் நம்ம வீட்டு பிள்ளை சிவகார்த்திகேயன், ப்ரியங்கா அருள் மோகன், வினய், யோகி பாபு உள்ளிட்டோர் நடிப்பில் வெளியாகியுள்ள திரைப்படம் ‘டாக்டர்’.

கே.ஜே.ஆர் ஸ்டுடியோஸ் நிறுவனமும், சிவகார்த்திகேயனின் எஸ் கே புரொடக்ஷன்ஸ்-ம் இணைந்து தயாரித்துள்ள இந்த திரைப்படம் கடந்த சனிக்கிழமை அக்டோபர் மாதம் 9 ஆம் தேதி தியேட்டர்களில் வெளியானது. இந்த டாக்டர் (Doctor) திரைப்படம் தமிழில் மட்டுமல்லாமல் தெலுங்கிலும் தமிழில் வெளியான அதே நாளில் வருண் டாக்டர் என்ற பெயரில் அக்டோபர் 9 ஆம் தேதி வெளியாகி களை கட்டியது.

தமிழகத்தில் மட்டும் சுமார் 700 திரையரங்குகளில் இத்திரைப்படம் வெளியாகியுள்ளது. விமர்சகர்கள் மத்தியிலும், ரசிகர்கள் மத்தியிலும் பரவலாக நல்ல வரவேற்பை பெற்றுள்ளது இந்த டாக்டர் திரைப்படம். குறிப்பாக படத்தின் காமெடி காட்சிகளுக்கு நல்ல வரவேற்பு கிடைத்துள்ளது. இந்நிலையில் இந்த படத்தின் வசூல் பற்றிய நம்பத்தகுந்த தகவல்கள் வெளியாகியுள்ளன.

அதன்படி டாக்டர் திரைப்படம் முதல் நாள் வசூலாக தமிழகத்தில் மட்டும் சுமாராக 7.36 கோடி ரூபாயை வசூலித்துள்ளது. 50% பார்வையாளர்களுக்கு மட்டுமே தற்போது திரையரங்குகளில் அனுமதி அளிக்கப்படுகிறது. அந்த வகையில் இந்த வசூல் மிகப்பெரியதாக பார்க்கப்படுகிறது. திரையரங்குகளில் களை கட்டிய கூட்டத்தால் கல்லா கட்டியுள்ளது டாக்டர்.

இதற்கு முன் சிவகார்த்திகேயன் நடித்த சீமராஜா திரைப்படம் தமிழகத்தில் முதல் நாளில் 10.80 கோடி வசூலித்ததே சிவகார்த்திகேயன் படங்களின் முதல் நாள் வசூல் சாதனை படைத்த திரைப்படம் என்பது குறிப்பிடத்தக்கது.