உத்தராகண்டில் நிலநடுக்கம்; டெல்லி வரை அதிர்வு!
டேராடூன்: உத்தராகண்ட் மாநிலத்தின் சாமோலி மாவட்டத்தில் நேற்றிரவு ஏற்பட்ட நிலநடுக்கத்தின் அதிர்வுகள் டெல்லி மற்றும் வடமாநிலங்களின் பல பகுதிகளிலும் உணரப்பட்டதால் மக்கள் அச்சமடைந்தனர்.
ரிக்டர் அளவில் 4.9 பதிவு
சாமோலி மாவட்டத்தை மையமாகக் கொண்டு அக்டோபர் 6ஆம் தேதி இரவு 10.23 மணிக்கு நிலநடுக்கம் ஏற்பட்டது. இது ரிக்டர் அளவுகோலில் 4.9 ஆகப் பதிவானதாக தேசிய நில அதிர்வியல் மையம் தெரிவித்துள்ளது.
பூமிக்கு அடியில் 13 கிலோ மீட்டர் ஆழத்தில் நிலநடுக்கம் உருவானது. அதன் மையப்பகுதி ஜோஷிமத்தில் இருந்து தெற்கே சுமார் 50 கிலோ மீட்டர் தொலைவில் அமைந்திருந்ததாக அதிகாரப்பூர்வத் தகவலில் குறிப்பிடப்பட்டுள்ளது.
வடமாநிலங்களில் உணரப்பட்ட அதிர்வு
உத்தராகண்ட் மட்டுமின்றி டெல்லி, நொய்டா, குருகிராம், உத்தரப்பிரதேசம், பஞ்சாப், ஹரியானா, இமாச்சலப்பிரதேசம் மற்றும் சண்டிகர் உள்ளிட்ட பகுதிகளிலும் அதிர்வுகள் உணரப்பட்டன.
வீடுகள் மற்றும் கட்டடங்களில் இருந்த சிலர் முன்னெச்சரிக்கையாக வெளியேறியதாகத் தகவல்கள் தெரிவிக்கின்றன. இன்று காலை நிலவரப்படி, நிலநடுக்கத்தால் உயிரிழப்பு அல்லது பெரிய அளவிலான சேதம் ஏற்பட்டதாக அதிகாரப்பூர்வத் தகவல் வெளியாகவில்லை.
அசாமிலும் நிலநடுக்கம்
இதற்கு முன்னதாக நேற்று அதிகாலை 4.23 மணிக்கு அசாம் மாநிலத்தின் நாகோன் பகுதியில் ரிக்டர் அளவில் 4.5 ஆக மற்றொரு நிலநடுக்கம் பதிவாகியிருந்தது. அது பூமிக்கு அடியில் 33 கிலோ மீட்டர் ஆழத்தில் ஏற்பட்டதாக தேசிய நில அதிர்வியல் மையம் தெரிவித்துள்ளது.
