பீச்சுக்குப் போறீங்களா? கவனம் மக்களே!
சென்னை: சென்னைக் கடற்கரையின் குறிப்பிட்ட பகுதிகளில் இன்று மாலை வரை கடல் நீரோட்டத்தின் வேகம் அதிகமாக இருக்கும் என்று இந்திய வானிலை ஆய்வு மையத்தின் சென்னை மண்டலப் புயல் எச்சரிக்கை மையம் அறிவித்துள்ளது.
எந்தப் பகுதிகளுக்கு எச்சரிக்கை?
பாலவாக்கம் முதல் லட்சுமிபுரம் ஓடைக்குப்பம் வரையிலான சென்னை கடற்கரைப் பகுதிகளுக்கு கடல் நீரோட்ட எச்சரிக்கை விடுக்கப்பட்டுள்ளது. இந்தப் பகுதிகளில் கடல் நீரோட்டத்தின் வேகம் விநாடிக்கு 1 முதல் 1.1 மீட்டர் வரை இருக்கக்கூடும் என்று கணிக்கப்பட்டுள்ளது.
செப்டம்பர் 30-ஆம் தேதி இரவு 7 மணிக்குத் தொடங்கிய இந்த எச்சரிக்கை, இன்று மாலை 7 மணி வரை அமலில் இருக்கும். துறைமுகம் மற்றும் கடல்சார் நடவடிக்கைகளில் ஈடுபடுபவர்கள் கவனமாக இருக்குமாறு அறிவுறுத்தப்பட்டுள்ளது.
கடலில் இறங்கும்போது கவனம்
கடல் நீரோட்டம் வெளிப்பார்வைக்குத் தெளிவாகத் தெரியாமல் இருக்கலாம். எனவே கடற்கரைக்குச் செல்பவர்கள் கடலுக்குள் ஆழமாகச் செல்வதைத் தவிர்த்து, குழந்தைகளைக் கண்காணிப்புடன் வைத்திருக்க வேண்டும். மீனவர்கள் மற்றும் சிறிய படகுகளை இயக்குபவர்கள் கூடுதல் விழிப்புடன் செயல்படுவது அவசியம்.
வட தமிழகக் கடலோரப் பகுதிகளில் பரவலாக மழை அல்லது இடியுடன் கூடிய மழையும், ஓரிரு இடங்களில் கனமழையும் பெய்யக்கூடும். மழையின்போது கடலில் பார்வைத்திறன் மிகவும் குறைய வாய்ப்புள்ளதாகவும் வானிலை மையம் தெரிவித்துள்ளது.
துறைமுகப் புயல் கூண்டு இல்லை
வட தமிழகக் கடலோரத்தில் மணிக்கு சுமார் 18 முதல் 28 கிலோ மீட்டர் வேகத்தில் தெற்கு அல்லது தென்மேற்குத் திசையிலிருந்து காற்று வீசக்கூடும். கடல் பொதுவாக மிதமான அமைதியுடன் காணப்படும் என்றும், தமிழகத் துறைமுகங்களில் புயல் எச்சரிக்கைக் கூண்டு ஏற்றப்படவில்லை என்றும் அதிகாரப்பூர்வ அறிவிப்பில் தெரிவிக்கப்பட்டுள்ளது.
