தீபாவளி பண்டிகையை முன்னிட்டு குவிந்த பக்தர்கள்… உண்டியல் வசூல் மழையில் திருப்பதி ஏழுமலையான் திருக்கோயில்!!

ஆந்திர மாநிலம் திருப்பதி திருமலையில் உள்ள ஏழுமலையான் திருக்கோயிலில் கொரோனா தளர்வுகளுக்கு அடுத்து பக்தர்கள் வருகை அதிகரிக்கத் தொடங்கியுள்ளது.

ஆந்திராவில் தினசரி எண்ணிக்கை சராசரியாக 28 ஆயிரம் என்ற அளவில் இருந்தது. தற்போது பக்தர்களின் வருகை 30 ஆயிரத்தை தாண்டியுள்ளது. அதிகபட்சமாக கடந்த ஒன்றாம் தேதி 35,747 பேர் திருமலையில் சாமி தரிசனம் செய்துள்ளனர். அன்றைய தினம் 2.77 கோடி ரூபாய் உண்டியலில் வசூலாகியுள்ளது. இவ்வாறு பக்தர்கள் செலுத்தும் காணிக்கைகள் சில்லரை, ரூபாய் நோட்டுகள், வெளிநாட்டு கரன்சிகள் என தனித்தனியாக பிரித்து கணக்கிடப்படுவது வழக்கம்.

பின்னர் மொத்த தொகையானது திருமலை திருப்பதி தேவஸ்தானம் மூலம் வங்கிகளில் தினசரி வரவு வைக்கப்படுகிறது. கடந்த செவ்வாய் அன்று காலை 6 மணி முதல் 8 மணி வரை திருமலையில் உள்ள நட நீரஞ்சனம் பிளாட்பார்மில் அகண்ட பாலகண்ட பாராயண நிகழ்வு அரங்கேற்றப்பட்டது. இது கொரோனா பெருந்தொற்றில் இருந்து மனித சமூகத்தை காப்பாற்றும் வகையில் ஏற்பாடு செய்யப்பட்டிருந்தது. இதில் எஸ்.வி வேத பல்கலைக்கழகத்தின் கீழ் செயல்படும் பல்வேறு நிறுவனங்களை சேர்ந்த வேத பண்டிதர்கள் கலந்து கொண்டு பாராயணம் நிகழ்த்தினர்.

163 ஸ்லோகங்களை கூறி பாராயண நிகழ்வை சிறப்பான முறையில் நடத்திக் கொடுத்தனர். இந்நிலையில் கடந்த 3ஆம் தேதி யாரும் எதிர்பார்த்திராத அளவு 4.16 கோடி ரூபாய் அளவிற்கு உண்டியலில் காணிக்கை வசூலாகி இருக்கிறது. இது கடந்த பல மாதங்களில் வசூலான உண்டியல் வருவாய்களில் அதிகபட்சமானது என தேவஸ்தான அதிகாரிகள் தெரிவித்துள்ளனர். அன்றைய தினம் 15 ஆயிரத்து 327 பேர் தங்களது திருப்பதியில் தலைமுடியை காணிக்கையாக அளித்துள்ளனர்.

30 ஆயிரத்து 379 பேர் சாமி தரிசனம் செய்திருக்கின்றனர். திருப்பதியில் உள்ள அனைத்து தேவஸ்தான கோயில்களிலும் நேற்று தீபாவளி சிறப்பு பூஜைகள் நடத்தப்பட்டன. இதில் திருமலையின் மூத்த மற்றும் இளம் குருமார்கள் கலந்து கொண்டு சிறப்பித்தனர். இதுதொடர்பாக செய்தியாளர்களிடம் பேசிய திருமலை திருப்பதி தேவஸ்தான செயல் அதிகாரி ஜவகர் ரெட்டி, ஆகம சாஸ்திராவின் படி ஒவ்வொரு ஆண்டும் தீபாவளி அஸ்தானம் நடத்தப்பட்டு வருகிறது.

பங்காரு வகிலியில் கருடாழ்வாருக்கு எதிரே உற்சவ மூர்த்திகளான ஸ்ரீ மலையப்பர், ஸ்ரீதேவி, பூதேவி, விஸ்வக்சேனா ஆகியோர் வைக்கப்பட்டிருந்தனர். உற்சவ மூர்த்திகள் அனைவருக்கும் பட்டாடைகள் உடுத்தப்பட்டிருந்தன. பின்னர் ருபாயி ஹாரதி, நைவேத்தியம் ஆகியவை நடத்தப்பட்டன.

இம்முறை நேரலை தரிசன சேவைகளை தேவஸ்தானம் ரத்து செய்திருந்தது. இதனால் திருக்கோயிலுக்கு வரவியலாத ஏழுமலையான் பக்தர்கள் மிகுந்த ஏமாற்றம் அடைந்தனர்.