பூந்தமல்லி அருகே லாரி திருட்டு…

பூந்தமல்லி அருகே லாரி திருடிய வழக்கில் இருவர் கைது.

திருவேற்காடு அடுத்த மாதிராவேடு பத்மாவதி நகரை சேர்ந்தவர் ரங்கநாதன். இவர் அந்த பகுதியில் உள்ள காலி இடத்தில் அவருக்கு சொந்தமான லாரியை நிறுத்தி வைப்பது வழக்கம். அதே போல் ஒரு நாள் இரவு நிறுத்திவிட்டு சென்றுள்ளார். காலையில் பார்க்கும்போது அவரது லாரியை காணவில்லை.

இதுகுறித்து திருவேற்காடு போலீசில் புகாரளித்தார். திருவேற்காடு போலீசார் வழக்குப்பதிவு செய்து லாரியை தேடினர். இந்நிலையில், பெரும்புதூர் அடுத்த வளர்புரம் என்னும் பகுதியில் ஒருவர் திருடப்பட்ட லாரி ஒன்றுடன் இருப்பதாக போலீசாருக்கு ரகசிய தகவல் கிடைத்தது. அதனை அடுத்து தகவல் வந்த இடத்திற்கு விரைந்தனர் போலீசார்.

அப்போது அந்த திருட்டு லாரியை எடுக்க வந்த திருவேற்காட்டை சேர்ந்த ராஜா, திருவண்ணாமலையை சேர்ந்த அஜித் ஆகிய 2 பேரை மடக்கிப்பிடித்து கைது செய்தனர். பின்னர் போலீசார் லாரியை பறிமுதல் செய்தனர். அவர்கள் வேறு ஏதாவது திருட்டு சம்பவத்தில் ஈடுபட்டுள்ளார்களா என்பது குறித்தும் போலீசார் தீவிரமாக விசாரிக்கின்றனர்.