அருந்ததியர் பிரிவினருக்கான உள் இடஒதுக்கீட்டை வழங்க மாநில அரசுக்கு உரிமை உள்ளது – உச்ச நீதிமன்றம் தீர்ப்பு

அருந்ததியர் பிரிவினருக்கான உள் இடஒதுக்கீட்டை வழங்க, மாநில அரசுக்கு உரிமை உள்ளது என்று உச்ச நீதிமன்றம் தீர்ப்பு வழங்கியுள்ளது.

தமிழக அரசு அருந்ததியர் சமூகத்திற்கு 3 சதவீத உள் இடஒதுக்கீடு வழங்கியதை எதிர்த்து, புதிய தமிழகம் கட்சியின் தலைவர் கிருஷ்ணசாமி, கடந்த 2011-ஆம் ஆண்டில், சென்னை உயர் நீதிமன்றத்தில் மனு ஒன்றை தாக்கல் செய்திருந்தார். ஆனால், இந்த மனு மீதான விசாரணையை, உச்ச நீதிமன்றத்திற்கு மாற்ற வேண்டும் என்று, கடந்த 2015-ஆம் ஆண்டில், சேலத்தைச் சேர்ந்த ஜே.யசோதா என்பவர் மாற்றல் மனு ஒன்றை தாக்கல் செய்தார்.

இந்நிலையில், கடந்த 2015-ஆம் ஆண்டில், இந்த வழக்கை 5 நீதிபதிகள் அடங்கிய அமர்வுக்கு மாற்றி, உச்ச நீதிமன்றம் உத்தரவு பிறப்பித்தது. இந்த வழக்கு மீதான விசாரணை நடைபெற்று, அனைத்து தரப்பு வாதங்களும் முடிவடைந்த நிலையில், கடந்த மாதம் 16-ஆம் தேதி காணொலி வாயிலாக, நீதிபதிகள் அருண் மிஸ்ரா, இந்திரா பானர்ஜி, வினித் சரண், எம்.ஆர்.ஷா, அனிருத்தா போஸ் ஆகியோர் அடங்கிய அமர்வு, இந்த வழக்கின் தீர்ப்பை தேதி குறிப்பிடாமல் ஒத்திவைத்தனர்.

இந்நிலையில், இந்த வழக்கின் மீதான தீர்ப்பு இன்று வழங்கப்பட்டது. அதில் பட்டியலினத்தவருக்கான இடஒதுக்கீட்டில் அருந்ததியினருக்கு உள்ஒதுக்கீடு வழங்க மாநில அரசுக்கு முழு அதிகாரம் உள்ளது என்று தீர்ப்பு வழங்கியுள்ளது.