திமுக பொதுக்குழு கூட்டம்..தீர்மானங்களுடன் நிறைவேறிய பலரது ஆசைகள்

திமுக பொதுக்குழு கூட்டத்தில் கட்சி பொதுச்செயலாளராக துரைமுருகனும், திமுக பொருளாளராக டி.ஆர்.பாலுவும் ஒருமனதாக தேர்ந்தெடுக்கப்பட்டனர்.

திமுக தலைவர் மு.க.ஸ்டாலின் தலைமையில் இன்று காலையில் தொடங்கி நடைபெற்ற பொதுக்குழு கூட்டத்தில், தமிழகம் முழுவதும் இருந்து காணொலி வாயிலாக திமுக பொதுக்குழு உறுப்பினர்கள் பங்கேற்றனர்.

அண்ணா அறிவாலயத்தில் துரைமுருகன், டி.ஆர்.பாலு உள்பட 70க்கும் மேற்பட்டோர் பங்கேற்றனர். கூட்டத்தில் 67 இடங்களில் இருந்து திமுக பொதுக்குழு உறுப்பினர்கள் சுமார் 3,500 பேர் பங்கேற்றனர்.

திமுக பொதுச்செயலாளராக துரைமுருகனும், பொருளாளராக டி.ஆர்.பாலுவும் போட்டியின்றி தேர்வு செய்யப்பட்டதாக அறிவிக்கப்பட்டு, கட்சி தலைவர் மு.க.ஸ்டாலின் அவர்களுக்கு வாழ்த்து தெரிவித்தார்.

திமுகவின் வரலாற்றில் 4 வது பொதுச்செயலாளராக துரைமுருகன் தேர்ந்தெடுக்கப்பட்டுள்ளார். 8 வது பொருளாளராக டி.ஆர்.பாலு தேர்ந்தெடுக்கப்பட்டுள்ளார்.

தொடர்ந்து, திமுக பொதுச்செயலாளருக்கான அதிகாரத்தை மீண்டும் பொதுச்செயலாளரிடமே ஒப்படைக்க சட்டத்திருத்தம் கொண்டு வரப்பட்டது.

ஏற்கெனவே கட்சி துணை பொதுச் செயலாளர்களாக ஐ.பெரியசாமி, சுப்புலட்சுமி ஜெகதீசன், அந்தியூர் செல்வராஜ் ஆகிய 3 பேர் பதவி வகிக்கும் நிலையில், அந்த எண்ணிக்கையை 5ஆக அதிகரிக்க சட்டவிதிகளில் திருத்தம் மேற்கொள்ளப்பட்டு, ஆ.ராசா,பொன்முடி ஆகியோர் கூடுதல் துணை பொதுச் செயலாளர்களாக நியமிக்கப்பட்டனர்.

இதையடுத்து திமுக பொதுக் குழுக் கூட்டத்தில் பல்வேறு தீர்மானங்கள் நிறைவேற்றப்பட்டன. அதில் நாடாளுமன்றம் கூடி அனைத்து மாநிலக் கட்சிகளும் விவாதிக்கும் வரை தேசிய கல்விக் கொள்கை-2020ஐ நடைமுறைப்படுத்தும் நடவடிக்கைகளில் மத்திய அரசு ஈடுபடக்கூடாது என வலியுறுத்தப்பட்டது.

தமிழகத்தின் இருமொழித் திட்டத்திற்கு எதிரான தேசிய கல்விக் கொள்கையை அதிமுக. அரசு கடுமையாக எதிர்த்திட வேண்டும் என்றும் தீர்மானம் நிறைவேற்றப்பட்டது.

மத்திய அரசின் சுற்றுச்சூழல் தாக்கல் அறிக்கை 2020, சுற்றுச்சூழல் பாதுகாப்புச் சட்டம் 1986-ஐ முற்றிலும் நீர்த்துப் போக வைக்கும் எனவும், சுற்றுச்சூழலையும், விவசாயப் பெருமக்களின் வாழ்க்கையையும், வேளாண்மையையும் உருக்குலைக்கும் திட்டங்களை ஊக்குவிக்க அது கொண்டு வரப்பட்டுள்ளது எனவும், ஆதலால் அதை மத்திய அரசு, நிபந்தனையின்றித் திரும்பப் பெற வேண்டும் எனவும் தீர்மானம் நிறைவேற்றப்பட்டது.