சர்ச்சையில் சிக்கிய ரோஹித், பந்த் : நடந்தது என்ன ?

இந்திய வீரர்கள் மீது எழுந்துள்ள புகாரை விசாரிக்க பிசிசிஐ குழு அமைத்துள்ளது.

ஆஸ்திரேலியா சென்றுள்ள இந்திய வீரர்கள் மருத்துவப் பாதுகாப்பு விதிமுறைக்கு உட்பட்டு உணவகங்களுக்குச் செல்ல அனுமதி வழங்கப்பட்டுள்ளது. இந்நிலையில் ரோஹித் ஷர்மா, ரிஷப் பந்த், நவ்தீப் சைனி, ஷுப்மன் கில், பிரித்வி ஷா போன்றவர்கள் உணவகத்திற்குச் சென்று மருத்துவப் பாதுகாப்பு விதிமுறைகளை கடைப்பிடிக்காமல் ரசிகர் ஒருவரிடம் நெருக்கம் காட்டியதாக புகார் வெளியானதால் இதுதொடர்பாக பிசிசிஐ விசாரணை நடத்தி வருகிறது.

புத்தாண்டு தினத்தன்று உணவகத்திற்குச் சென்ற ரோஹித் உட்பட ஐந்து இந்திய வீரர்களை நவல்தீப் சிங் என்ற ரசிகர் சந்தித்துள்ளார். அதன்பிறகு, வீரர்கள் சாப்பிட்டதற்குப் பணம் செலுத்திய அவர், அதைப் புகைப்படம் எடுத்துள்ளார். மேலும், வீரர்கள் மேஜையில் அமர்ந்திருக்கும் போது அவர்களுக்கே தெரியாமல் புகைப்படம் எடுத்து இரண்டையும் ட்விட்டரில் பதிவேற்றம் செய்து, ’ரிஷப் பந்தை நான் கட்டித் தழுவினேன்’ என்ற வாசகத்தை இணைத்து பிசிசிஐயை அதிர வைத்துள்ளார்.

Read more – பாஜகவின் கொரோனா தடுப்பூசியை செலுத்திக்கொள்ள முடியாது : அகிலேஷ் யாதவ் பேட்டி
.
வீரர்கள் உணவகத்திற்கு வருகை தந்ததை ஊழியர் ஒருவரும் உறுதிப்படுத்தியுள்ளார். இதனால், பிசிசிஐக்கு சங்கடமான நிலை உருவாகியுள்ளது. இந்நிலையில், இந்திய வீரர்களைச் சந்தித்த நவல்தீப் சிங் என்ற ரசிகர் தற்போது மேலும் ஒரு ட்வீட்டை வெளியிட்டுள்ளார். அதில், ”நான் ரிஷிப் பந்தை கட்டிப்பிடிக்கவில்லை. அளவற்ற மகிழ்ச்சியில் இருந்ததால் அப்படிப் பதிவிட்டேன். வீரர்கள் மருத்துவப் பாதுகாப்பு விதிமுறையை மீறவில்லை” எனப் பதிவிட்டுள்ளார். இருப்பினும் இதுதொடர்பாக பிசிசிஐ தீவிரமாக விசாரித்து வருகிறது.
ஆஸ்திரேலிய நாட்டைப் பொறுத்தவரை மருத்துவப் பாதுகாப்பை மிகத் தீவிரமாக கடைப்பிடிக்கும் நாடு. டேவிட் வார்னர், வில் புகோவ்ஸ்கி போன்றவர்கள் காயத்திலிருந்து குணமடைந்த பின்பு கூட அவர்களை உடனே அணியில் சேர்க்கவில்லை. 14 நாட்கள் தனிமை முகாமிற்கு அனுப்பி மீண்டும் தற்போது மூன்றாவது டெஸ்டில் சேர்த்தனர். அதேபோல், ரோஹித் ஷர்மாவின் தனிமை முகாமிற்கான நாட்களை குறைக்க வேண்டுகோள் விடுத்தபோது அதையும் நிராகரித்தார்கள்.

தற்போது, ரிஷப் பந்த் ரசிகர் ஒருவரைக் கட்டிப்பிடித்ததாக எழுந்துள்ள குற்றச்சாட்டு உண்மையானால், ஐந்து இந்திய வீரர்களையும் கொரோனா பரிசோதனைக்கு அனுப்பி 14 நாட்கள் தனிமைப்படுத்தவும் வாய்ப்புள்ளது. இந்த விவகாரம் தொடர்பாக தற்போது விசாரணை நடத்தி வரும் பிசிசிஐ கொடுக்கும் அறிக்கையைப் பொறுத்து ஆஸ்திரேலிய அரசு நடவடிக்கை எடுக்கும் எனத் தகவல் வெளியாகியுள்ளது.