கோவை அருகே கடன் தொல்லை காரணமாக ஒரே குடும்பத்தைச் சேர்ந்த 3 பேர் தற்கொலை செய்துகொண்ட சம்பவம், அப்பகுதியில் பெரும் சோகத்தை ஏற்படுத்தி உள்ளது.

கோவையை அடுத்த மருதமலை அடிவாரத்தில் உள்ள அமர்ஜோதி காலனியைச் சேர்ந்தவர் சிவமுருகன்(50). இவரது மனைவி வைரராணி(40). இந்த தம்பதியினருக்கு யுவஸ்ரீ(22), ஹேமா(19) என்ற இரண்டு மகள்கள் உள்ளனர்.

பால் வியாபாரியான சிவமுருகன், இதற்கு முன்னதாக சிட்பண்ட் நடத்தி வந்துள்ளார். சிவமுருகனிடம் கடன் வாங்கிய பலரும், கடனை சரிவர திருப்பி தரவில்லை என்று கூறப்படுகிறது. இதனால் தன்னிடம் சீட்டு போட்டவர்களுக்குப் பணத்தைத் திருப்பி தர முடியாமல் சிவமுருகன் அவதிப்பட்டு வந்துள்ளார். இதன் காரணமாக பால் வியாபாரத்தை தொடங்கியுள்ளார்.

பால் வியாபாரத்திலும் கடன் தொல்லை அதிகமாகயுள்ளது. கடன் கொடுத்தவர்கள் பணத்தைத் திருப்பி கேட்டு தொந்தரவு செய்து வந்த நிலையில், பல நாட்களாக மிகுந்த குழப்பத்துடன் காணப்பட்டுள்ளதாக தெரிகிறது. மேலும், இவரிடம் கடன் வாங்கியவர்களும், அதனை திருப்பித் தராமல் இழுத்தடித்து வந்துள்ளனர். இதனால் மிகுந்த மன உளைச்சலுக்கும் ஆளாகியுள்ளார். இதனால் மனமுடைந்த சிவமுருகன், குடும்பத்துடன் தற்கொலை செய்து கொள்ள முடிவு செய்துள்ளார்.

அதன்படி, நேற்று நள்ளிரவு வாழை பழத்தில் விஷம் வைத்து தனது மனைவி மற்றும் 2 மகள்களுக்கும் கொடுத்து விட்டு, சிவமுருகனும் சாப்பிட்டுள்ளார். இதை சாப்பிட்ட சிவமுருகன், வைரமணி மற்றும் யுவஸ்ரீ ஆகியோர் சம்பவ இடத்திலேயே உயிரிழந்தனர். மற்றொரு மகளான ஹேமா, தந்தை கொடுத்த பழத்தைச் சாப்பிடாததால் உயிர் தப்பியுள்ளார்.

இதுக்குறித்து தகவல் அறிந்து சம்பவ இடத்திற்கு விரைந்த வந்த  போலீஸார், 3 பேரின் சடலங்களையும் மீட்டு பிரேதப் பரிசோதனைக்காக கோவை அரசு மருத்துவமனைக்கு அனுப்பி வைத்தனர். விசாரணையின் போது, சிவமுருகன் எழுதி வைத்திருந்த கடிதம் ஒன்றையும் போலீஸார் கைப்பற்றியுள்ளனர். அந்த கடிதத்தில், கடன் தொல்லை தாங்க முடியாமல் தற்கொலை செய்வகொள்வதாக எழுதப்பட்டு இருந்தது. இதுக்குறித்து போலீஸார் வழக்கு பதிவு செய்து, தொடர்ந்து விசாரணை நடத்தி வருகின்றனர்.