தமிழகம், புதுச்சேரியில் வடகிழக்குப் பருவமழை தொடங்கியது!

சென்னை: தமிழகம் மற்றும் புதுச்சேரியில் வடகிழக்குப் பருவமழை தொடங்கியுள்ளதாக இந்திய வானிலை ஆய்வு மையம் அறிவித்துள்ளது. இதனிடையே, நீலகிரி, கோவை, தேனி மற்றும் விருதுநகர் மாவட்டத்தின் மலைப்பகுதிகளில் இன்று அக்டோபர் 15 ஓரிரு இடங்களில் கன முதல் மிகக் கனமழை பெய்யக்கூடும் என முன்னறிவிக்கப்பட்டுள்ளது.

தமிழகத்தின் பல பகுதிகளில் இடி, மின்னலுடன் மழை தொடர வாய்ப்புள்ளது. சில இடங்களில் மணிக்கு 40 முதல் 50 கிலோமீட்டர் வேகத்தில் பலத்த காற்றும் வீசக்கூடும்.

15 மாவட்டங்களில் கனமழைக்கு வாய்ப்பு

மயிலாடுதுறை, நாகப்பட்டினம், திருவாரூர், தஞ்சாவூர், கடலூர், தென்காசி, கன்னியாகுமரி, கள்ளக்குறிச்சி, சேலம், திருச்சி, காஞ்சிபுரம், செங்கல்பட்டு, ராணிப்பேட்டை, திருப்பூர் மற்றும் திண்டுக்கல் மாவட்டங்களில் ஓரிரு இடங்களில் இன்று கனமழை பெய்யக்கூடும்.

புதுச்சேரி மற்றும் காரைக்கால் பகுதிகளிலும் கனமழைக்கு வாய்ப்புள்ளது. தமிழகத்தின் மற்ற பகுதிகளில் அநேக இடங்களில் இடி, மின்னலுடன் மிதமான மழை பெய்யக்கூடும்.

சென்னைக்கு நாளை கனமழை முன்னறிவிப்பு

சென்னையில் இன்று சில பகுதிகளில் இடி, மின்னலுடன் மிதமான மழைக்கு வாய்ப்புள்ளது. நாளை அக்டோபர் 16 சென்னை, திருவள்ளூர், செங்கல்பட்டு, காஞ்சிபுரம், ராணிப்பேட்டை உள்ளிட்ட மாவட்டங்களில் ஓரிரு இடங்களில் கனமழை பெய்யக்கூடும்.

மேற்கு மாவட்டங்கள், டெல்டா மாவட்டங்கள் மற்றும் புதுச்சேரி, காரைக்கால் பகுதிகளிலும் நாளை கனமழைக்கு வாய்ப்புள்ளதாக முன்னறிவிக்கப்பட்டுள்ளது.

மழைக்கு ஆதரவான வளிமண்டலச் சூழல்

குமரிக்கடல் பகுதியில் நிலவும் வளிமண்டலச் சுழற்சி மற்றும் அங்கிருந்து வடமேற்கு வங்கக்கடல் வரை நீளும் காற்றழுத்தத் தாழ்வுப் பாதை ஆகியவை மழைக்கு ஆதரவாக உள்ளன. வரும் நாட்களிலும் தமிழகத்தின் பல பகுதிகளில் மழை தொடரக்கூடும்.