By திருவண்ணாமலை அருகே பிரபல ரவுடி பங்க் பாபு என்பவர் இன்று மர்ம நபர்களால் வெட்டி படுகொலை செய்யப்பட்டார். கொலையில் தொடர்புடைய மர்ம நபர்களை போலீசார் தீவிரமாக தேடி வருகின்றனர்.
திருவண்ணாமலை, காந்திநகர் பகுதியில் வசித்து வருபவர் பிரபல ரவுடி பங்க் பாபு. இவர் இன்று 4 பேர் கொண்ட மர்ம கும்பலால் சரமாரியாக வெட்டிக் கொலை செய்யப்பட்டார். தகவலறிந்து சம்பவ இடத்திற்கு விரைந்து வந்தப் போலீசார், பாபுவின் உடலை மீட்டு பிரேத பரிசோதனைக்காக மருத்துவமனைக்கு அனுப்பி வைத்தனர். மேலும், இதுகுறித்து வழக்கு பதிவு செய்த போலீசார், கொலையில் தொடர்புடைய மர்ம நபர்களை தேடும் பணியில் தீவிரமாக இறங்கியுள்ளனர்.
மேலும், அப்பகுதியில் இருக்கும் சிசிடிவி காட்சிகளை சேகரித்து, அதை ஆய்வுக்கு உட்படுத்தி, குற்றவாளிகளை தேடும் பணியில் போலீசார் ஈடுபட்டு வருகின்றனர். முதற்கட்ட விசாரணையில், முன் விரோதம் காரணமாக, கனகராஜின் உறவினர்கள் பாபுவை கொலை செய்திருக்கலாம் என்று தெரிய வந்துள்ளது. முன்விரோதம் தான் காரணமா, அல்லது வேறு ஏதேனும் காரணம் உள்ளதா என்ற கோணத்திலும், போலீசார் விசாரணையை முடக்கி விட்டுள்ளனர்.
பங்க் பாபு மீது, கொலை உள்ளிட்ட பல்வேறு வழக்குகள் காவல் நிலையத்தில் நிலுவையில் உள்ளன. மேலும், அ.தி.மு.க.வின் நகர செயலாளராக பதிவி வகித்து வந்த கனகராஜ் என்பவர், கடந்த 2017-ஆம் ஆண்டு கொலை செய்யப்பட்டார். இவரது கொலையிலும், பாபு முக்கிய குற்றவாளியாக சேர்க்கப்பட்டுள்ளார் என்பது குறிப்பிடத்தக்கது.
ஆள் நடமாட்டம் அதிகம் உள்ள பகுதியில், பிரபல ரவுடி ஒருவர் 4 பேர் கொண்ட மர்ம கும்பலால் சரமாரியாக வெட்டிக் கொலை செய்யப்பட்ட சம்பவத்தால், அப்பகுதி மக்கள் பெரும் அச்சத்தில் உள்ளனர். இதனால் அந்தப் பகுதியில் போலீசார் குவிக்கப்பட்டுள்ளனர்.
இதையும் படியுங்கள் : நாளைக்கு கடைசி நாள் : எஸ்.பி.ஐ. வங்கியில் 2000 காலிபணியிடங்கள்… மிஸ் பண்ணிடாதீங்க
