வாட்ஸ்அப் கணக்கு இல்லையா? இனி அழைப்பில் இணையலாம்!

வாட்ஸ்அப் கணக்கு இல்லாதவர்களும் அதன் அழைப்புகளில் இணைய உதவும் ‘Guest Calling’ வசதியை வாட்ஸ்அப் அறிமுகப்படுத்தியுள்ளது. கணினியின் இணைய உலாவி வழியாக அழைப்பு இணைப்பைத் திறந்து, விருந்தினராகப் பங்கேற்கலாம்.

அக்டோபர் 14-ஆம் தேதி அறிவிக்கப்பட்ட இந்த வசதியின் மூலம், தனிநபர் மற்றும் 32 பேர் வரை பங்கேற்கும் குழு அழைப்புகளில் வாட்ஸ்அப் கணக்கு இல்லாதவர்களையும் சேர்க்க முடியும்.

எப்படி பயன்படுத்துவது?

வாட்ஸ்அப் பயன்படுத்துபவர், செயலியின் Calls பகுதிக்குச் சென்று, ‘+’ குறியீட்டைத் தேர்ந்தெடுத்து அழைப்புக்கான இணைப்பை உருவாக்க வேண்டும். அதை அழைப்பில் பங்கேற்க விரும்புவோருக்கு அனுப்பலாம்.

அந்த இணைப்பைப் பெறுபவர், கணினியின் இணைய உலாவியில் திறந்து தனது பெயரைப் பதிவிட்டு இணையலாம். அழைப்பை நடத்துபவர் அனுமதித்த பிறகே அவரால் உரையாடலில் பங்கேற்க முடியும். அழைப்பு இணைப்பை உருவாக்குவதற்கு வாட்ஸ்அப் கணக்கு அவசியம்.

பாதுகாப்பு ஏற்பாடுகள் என்ன?

விருந்தினர்கள் முதலில் காத்திருப்பு அறையில் இருப்பார்கள். அவர்களை அனுமதிக்கவும், தேவைப்பட்டால் அழைப்பிலிருந்து நீக்கவும் அழைப்பை நடத்துபவருக்கு அதிகாரம் உள்ளது.

விருந்தினர்களால் மற்றவர்களின் தொலைபேசி எண்களைப் பார்க்கவோ, செய்திகளை அனுப்பவோ, வேறு நபர்களை நேரடியாக அழைப்பில் சேர்க்கவோ முடியாது.

இந்த அழைப்புகளுக்கு முனையத்துக்கு முனையம் மறையாக்கப் பாதுகாப்பு வழங்கப்படுவதாகவும், அழைப்புகளுக்குக் காலவரம்பு இல்லை என்றும் நிறுவனம் தெரிவித்துள்ளது. விருந்தினர்கள் கணினித் திரையைப் பகிரவும், கை உயர்த்தவும், எமோஜிகள் மூலம் கருத்துத் தெரிவிக்கவும் முடியும்.