By கோபத்தை குறைத்துக்கொள்ளுமாறு தனக்கு ட்ரம்ப் கூறிய அதே அறிவுரையை, க்ரெட்டா தன்பெர்க் தற்போது ட்ரம்புக்கு திரும்ப கொடுத்துள்ளார்.
அமெரிக்க அதிபர் தேர்தலில் பதிவான வாக்குகளை எண்ணும் பணி 3 நாட்களாக நடைபெற்று வரும் நிலையிலும், வெற்றியாளர் யார் என்பதை தீர்மானிப்பதில் ட்ரம்ப் மற்றும் ஜோ பைடன் இடையே கடும் போட்டி நிலவுகிறது. இதனிடையே, எதிர்க்கட்சிசிகள் தனது வெற்றியாக பறிக்க சதி செய்வதாக ட்ரம்ப் ஆவேசமாக, பல்வேறு குற்றச்சாட்டுக்களை முன்வைத்து வருகிறார்.
முன்னதாக, ஐக்கி நாடுகள் அவையின் 74வது பொதுக்கூட்டத்தில் டிரம்ப் உள்ளிட்ட உலக தலைவர்களை கடுமையாக விமர்சித்து, உலக அளவில் பிரபலமானவர் ஸ்வீடன் நாட்டை சேர்ந்த 16 வயது சிறுமியும், சுற்றுச்சூழல் ஆர்வலருமான க்ரெட்டா தன்பெர்க். கடந்த ஆண்டு ஆகஸ்டு மாதம், உலக வெப்பமயமாதலை தடுக்க வலியுறுத்தி ஸ்வீடன் நாடாளுமன்ற வளாகம் முன்பு தனி ஒரு ஆளாக போராட்டம் நடத்தி உலக மக்களின் கவனத்தையும் இவர் பெற்றார்.
அதைதொடர்ந்தே ஐ.நா.வில் இவரின் உரையும் உலக அளவில் பெரும் ஆதரவைப் பெற்றது. ஆனால் அதன்பின் க்ரெட்டா மற்றும் ட்ரம்ப் இடையே அவ்வப்போது வார்தைமோதல் நடந்து வந்தது. டைம்ஸ் இதழின் 2019ம் ஆண்டுக்கான சிறந்த நபராக கிரேட்டா தன்பெர்க் தேர்ந்தெடுக்கப்பட்டபோது, இதுகுறித்து தனது ட்விட்டர் பக்கத்தில் பதிவிட்ட ட்ரம்ப், “மிகவும் அபத்தமானது. க்ரெட்டா தனது கோப மேலாண்மை பிரச்சனைக்குத் தீர்வு கண்டறிய வேண்டும். இல்லையென்றால் நண்பருடன் ஒரு நல்ல பழைய திரைப்படத்திற்கு செல்லுங்கள்! சில் க்ரெட்டா, சில்!” எனத் தெரிவித்திருந்தார்.
இந்நிலையில், தற்போது அமெரிக்க வாக்கு எண்ணிக்கை குறித்து ஆவேசமாக பல்வேறு குற்றச்சாட்டுகளை முன்வைத்து வரும் ட்ரம்ப்பின் கருத்துக்குப் பதில் தெரிவித்துள்ள க்ரெட்டா, “மிகவும் அபத்தமானது. ட்ரம்ப் தனது கோப மேலாண்மை பிரச்சனைக்குத் தீர்வு கண்டறிய வேண்டும். இல்லையென்றால் நண்பருடன் ஒரு நல்ல பழைய திரைப்படத்திற்கு செல்லுங்கள்! சில் டொனால்ட், சில்!” என பதிலடி தந்துள்ளார். இந்த பதிவிற்கு 10 லட்சத்திற்கும் அதிகமான மக்கள் லைக்குகளை அள்ளித் தெளித்துள்ளனர்.
