பாலங்களைக் குறிவைக்கும் ரஷ்யா; கீவில் போக்குவரத்து முடக்கம்!

பாலங்களைக் குறிவைக்கும் ரஷ்யா; கீவில் போக்குவரத்து முடக்கம்!

கீவ்: உக்ரைன் தலைநகர் கீவில் நீப்ரோ ஆற்றின் குறுக்கே அமைந்துள்ள முக்கியப் பாலங்களைக் குறிவைத்து ரஷ்யா தொடர்ந்து வான்வழித் தாக்குதல் நடத்தி வருகிறது. சனிக்கிழமை அதிகாலை நடத்தப்பட்ட தாக்குதலில் வடக்குப் பாலம் சேதமடைந்ததால், அதில் போக்குவரத்து முழுமையாக நிறுத்தப்பட்டது.

தாக்குதலில் பாலத்தின் சாலைப் பகுதியும், டிராலி பேருந்துகளுக்கான மின்கம்பிகளும் சேதமடைந்ததாக கீவ் மேயர் விட்டாலி கிளிட்ச்கோ தெரிவித்துள்ளார். அவசரகால மீட்புப் படையினர் சம்பவ இடத்தில் பணியில் ஈடுபட்டுள்ளனர். இந்தத் தாக்குதலில் உயிரிழப்போ காயமோ ஏற்படவில்லை.

மூன்று நாட்களாகப் பாதிப்பு

இதற்கு முந்தைய இரண்டு நாட்களில் கீவின் தெற்குப் பாலத்தின் மீது ரஷ்ய ஆளில்லா விமானங்கள் பலமுறை தாக்குதல் நடத்தியிருந்தன. இதன் காரணமாக தெற்குப் பாலம் உள்ளிட்ட மூன்று முக்கியப் பாலங்களில் போக்குவரத்து முழுமையாக அல்லது பகுதியாக நிறுத்தப்பட்டது.

நீப்ரோ ஆற்றைக் கடக்கும் கீவின் ஆறு முக்கியச் சாலைப் பாலங்களில் மூன்று பாலங்கள் பாதிக்கப்பட்டதால், நகரின் கிழக்கு மற்றும் மேற்குப் பகுதிகளுக்கு இடையிலான போக்குவரத்தில் கடும் நெரிசல் ஏற்பட்டுள்ளது.

மக்களின் இயல்பு வாழ்க்கை பாதிப்பு

கீவ் நகரில் சுமார் 30 லட்சம் பேர் வசிக்கின்றனர். இவர்களில் மூன்றில் ஒரு பங்கிற்கும் அதிகமானோர் நீப்ரோ ஆற்றின் கிழக்குக் கரையில் வசிக்கும் நிலையில், அரசு அலுவலகங்கள் மற்றும் பெரும்பாலான நிறுவனங்கள் மேற்குக் கரையில் அமைந்துள்ளன. இதனால் தினமும் பாலங்களைக் கடந்து பணிக்குச் செல்லும் மக்கள் கடுமையாகப் பாதிக்கப்பட்டுள்ளனர்.

பொதுமக்களின் போக்குவரத்தையும் நகரின் அன்றாடச் செயல்பாடுகளையும் முடக்குவதற்காகப் பாலங்களை ரஷ்யா குறிவைப்பது புதிய தாக்குதல் உத்தியாக இருக்கலாம் என்று சர்வதேச ஊடகங்கள் தெரிவித்துள்ளன.

ரஷ்யா அளித்த விளக்கம்

உக்ரைன் படையினரின் நகர்வு மற்றும் ராணுவத் தளவாடப் போக்குவரத்துக்கு வடக்குப் பாலம் பயன்படுத்தப்படுவதாகக் கூறியுள்ள ரஷ்யப் பாதுகாப்பு அமைச்சகம், தாக்குதல் நடத்தியதை உறுதிப்படுத்தியுள்ளது. பொதுமக்களை திட்டமிட்டுக் குறிவைப்பதில்லை என்றும் ரஷ்யா தொடர்ந்து கூறி வருகிறது.

எனினும், குடியிருப்புகள், பள்ளிகள், எரிபொருள் நிலையங்கள், மின் கட்டமைப்புகள் மற்றும் பாலங்கள் மீதான தாக்குதல்கள் அதிகரித்திருப்பது கீவ் மக்களிடையே அச்சத்தை ஏற்படுத்தியுள்ளது. குளிர்காலம் நெருங்கும் நிலையில் மின் கட்டமைப்புகள் மீதான தாக்குதல்களும் தீவிரமடையலாம் என்று உக்ரைன் அதிகாரிகள் எச்சரித்துள்ளனர்.

Related Articles

Leave a Reply

Your email address will not be published. Required fields are marked *